গোৱালপাৰা জিলাত কমা নাই হাতী-মানুহৰ সংঘাত। এইবাৰ গোৱালপাৰাত বন্যহস্তীৰ আক্ৰমণত নিহত হৈছে এজন বয়োজেষ্ঠ লোক।
সদায়ৰ দৰে পুৱা ঘৰৰ পৰা চাইকেলেৰে ৰবৰৰ বাগিছাত ৰবৰ কাটিবলৈ গৈ থকা অৱস্থাত তেওঁ বন্যহস্তীৰ মুখামুখি হয় আৰু বন্যহস্তীয়ে তেওঁক আক্ৰমণৰ লক্ষ্য কৰি লয়। কোনো উপায়েৰে পলাবলৈ সক্ষম নোহোৱা ব্যক্তিগৰাকীক হাতীকে গচকি মোহাৰি পেলায়। যাৰ ফলত থিতাতে তেওঁৰ মৃত্যু হয়।
জানিব পৰা মতে মৃত ব্যক্তিজনৰ বয়স ৬০ বছৰ। তেওঁৰ নাম নৰেশ্বৰ ৰাভা।
মৰনৈ আৰক্ষী থানাৰ অন্তৰ্গত দহিকতা পোহলানপাৰাত সংঘটিত হৈছে এই মৰ্মান্তিক ঘটনা।
ঘটনাটো সংঘটিত হোৱাৰ পিছতেই স্থানীয় লোকে শীঘ্ৰে এই বিষয়ে প্ৰশাসনক অৱগত কৰে আৰু প্ৰশাসন উপস্থিত হৈ মৃতদেহটো মৰণোত্তৰ পৰীক্ষাৰ বাবে প্ৰেৰণ কৰে। এই মৰ্মান্তিক কাণ্ডৰ পিছতে অঞ্চলটোৰ শোকৰ ছাঁ বিৰাজ কৰিছে।
