এক চাঞ্চল্যকৰ হত্যাকাণ্ডই আজি পুনৰ জোকাৰি তুলিছে জম্মু-কাশ্মীৰ। উপত্যকাটোৰ বাৰামুল্লা জিলাত মছজিদত নামাজ পঢ়ি থকা অৱস্থাতে জম্মু-কাশ্মীৰ আৰক্ষীৰ এজন অৱসৰপ্ৰাপ্ত জ্যেষ্ঠ আৰক্ষী বিষয়াক গুলীয়াই হত্যা কৰে সন্ত্ৰাসবাদীয়ে।
আৰক্ষীয়ে ঘটনা সন্দৰ্ভত জানিবলৈ দিয়া মতে, বাৰামুল্লাৰ গন্তামুল্লা বালা অঞ্চলত সংঘটিত হয় এই ঘটনা। অৱসৰপ্ৰাপ্ত জ্যেষ্ঠ আৰক্ষী বিষয়াজনে স্থানীয় মছজিদত নামাজ পঢ়ি থকা সময়তে তেওঁৰ ওপৰত গুলীবৰ্ষণ কৰে।
এই আক্ৰমণত লগে লগে মৃত্যু হয় প্ৰাক্তন বিষয়াজনৰ। নিহত বিষয়াজনক অৱসৰপ্ৰাপ্ত জ্যেষ্ঠ আৰক্ষী অধীক্ষক মহম্মদ শ্বাফি মিৰ বুলি চিনাক্ত কৰে।
এই ঘটনাৰ আঁৰত কোন জড়িত আছে তথা কিয় এই হত্যাকাণ্ড সংঘটিত হ’ল সেয়া এইপৰ্যন্ত নিশ্চিত হোৱা নাই। ঘটনাৰ পিছতে জম্মু-কাশ্মীৰ আৰক্ষীয়ে অঞ্চলটো ঘেৰাও কৰি তদন্ত আৰম্ভ কৰে।
উল্লেখ্য যে যোৱা মাহতো জম্মু-কাশ্মীৰত সংঘটিত হৈছিল এনে এক অনুৰূপ ঘটনা। শ্ৰীনগৰৰ ঈদগাহ মছজিদৰ সমীপত সন্ত্ৰাসবাদীৰ আক্ৰমণত ৰাজ্য আৰক্ষীৰ এজন আৰক্ষী পৰিদৰ্শক গুৰুতৰভাৱে আহত হৈছিল।
শ্ৰীনগৰৰ ঈদগাহ খেলপথাৰত স্থানীয় কিছু যুৱকৰ সৈতে বিষয়াজনে ক্ৰিকেট খেলি থকাৰ সময়তে সংঘটিত হৈছিল এই ঘটনা। ঘটনাৰ পিছতে তেওঁক ওচৰৰ চিকিৎসালয়ত ভৰ্তি কৰোৱা হৈছিল।
