২০২০ বৰ্ষই সমগ্ৰ বিশ্ববাসীৰ বাবে বিপৰ্যই কঢ়িয়াই আনিলেও কাজিৰঙা ৰাষ্ট্ৰীয় উদ্যানৰ বাবে কঢ়িয়াই আনিছিল কিছু ইতিবাচক চিন্তা। কিছু সম্ভাৱনা।
কেতবোৰ ইতিবাচক কাৰ্যকলাপে ২০২০ চনটো কাজিৰঙা ৰাষ্ট্ৰীয় উদ্যানৰ বাবে এক উল্লেখনীয় বছৰ হিচাপে পৰিগণিত হ’ল।
মনকৰিবলগীয়া যে ২০২০ চনেই নহয় ২০১৯ চনৰে পৰা কাজিৰঙাত গঁড় হত্যা নিয়ন্ত্ৰিত হোৱাতো মন কৰিব লগীয়া।
বিশ্বজুৰি চলা ক’ভিড-১৯ ৰ সংক্ৰমণৰ বাবে হোৱা লকডাউন আৰু ভালেমান ক’ভিড প্ৰতিৰোধৰ কেতবোৰ বাধ্য বাধকতাৰ মাজত কাজিৰঙাত চোৰাং চিকাৰীয়ে গঁড় হত্যাৰ প্ৰচেষ্টা চলাই আছিল যদিও আশাপ্ৰদভাৱে সফল হোৱা নাছিল।
২০২০ চনৰ অন্তিম দিনলৈকে ৰাষ্ট্ৰীয় উদ্যানখনত চোৰাংচিকাৰীয়ে দুটা গঁড় আৰু ২০১৯ চনত তিনিটা গঁড় হত্যা কৰিছিল।
যোৱাটো বৰ্ষত কাজিৰঙাৰ অগৰাতলি বনাঞ্চল আৰু কহঁৰা বনাঞ্চলত এটাকৈ গঁড় চোৰাং চিকাৰীয়ে হত্যা কৰিছিল।
২০২০ চনৰ ৯ মে’ ৰ দিনা অগৰাতলিৰ ডোৰামাৰি বিলৰ পাৰত আৰু ৭ আগষ্টত কহঁৰাৰ কাঠনিবাৰীৰ সমীপত গঁড় হত্যা কৰিছিল চোৰাংচিকাৰীয়ে।
ইয়াৰ মাজতে ৰাষ্ট্ৰীয় উদ্যানত চলা গঁড় হত্যাৰ অবিৰত প্ৰচেষ্টা প্ৰতিহত কৰিবলৈ সক্ষম হৈছিল কাজিৰঙা ৰাষ্ট্ৰীয় উদ্যানৰ বনকৰ্মী সকলে।
২০২০ চনৰ বিয়লি এই প্ৰসংগত মন্তব্য প্ৰকাশ কৰি কাজিৰঙাৰ ডি এফ অ’ ৰমেশ কুমাৰ গগৈয়ে জনাই যে বিগত সময়চোৱাত বনকৰ্মীয়েই নহয় আৰক্ষী বা বন্যপ্ৰাণী অপৰাধ নিয়ন্ত্ৰত জড়িত বিভিন্ন বিভাগৰ উমৈহতীয়া প্ৰচেষ্টাত কাজিৰঙাত গঁড় হত্যা প্ৰতিৰোধ কৰাত কিছু পৰিমানে সফলতা পোৱা গৈছিল।
বনবিভাগ আৰু আৰক্ষীৰ যুটীয়া প্ৰচেষ্টাত কাজিৰঙাত গঁড় হত্যাৰ বাবে গঢ়ি উঠা চোৰাংচিকাৰীৰ শক্তিশালী নেটৱৰ্ক ভাঙি দিবলৈ সক্ষম হোৱাৰ বাবেই গঁড় হত্যাৰ বাবে চোৰাংচিকাৰীয়ে চলোৱা প্ৰচেষ্টা ব্যৰ্থ কৰিবলৈ আমি সক্ষম হৈছিলো বুলি বিষয়া গৰাকীয়ে জনায়।
মুখ্য মন্ত্ৰী সৰ্বানন্দ সোণোৱালে সঘনাই কৰা পৰ্যবেক্ষনেও এই সক্ৰিয়তা সফল হোৱাত সহায়ক হৈছিল বুলি তেওঁ মন্তব্য কৰে।
ইয়াৰ পিছতো কিন্তু ৰাষ্ট্ৰীয় উদ্যানখনত চোৰাংচিকাৰী হেঁচা অব্যাহত আছিল।
যোৱা দুটা বছৰত গঁড় হত্যা প্ৰতিৰোধ কৰাৰ ক্ষেত্ৰত বন্যপ্ৰাণী অপৰাধ নিয়ন্ত্ৰনত জড়িত বিভিন্ন সন্থা আৰু বিভাগবোৰৰ কথাও তেওঁ উল্লেখ কৰে।
মন কৰিব লগীয়াযে কাজিৰঙাত গঁড় হত্যাৰ কৌশল চোৰাংচিকাৰীয় নিতৌ সলনি কৰাৰ লগে লগে বনকৰ্মীয়েও গঁড় হত্যা প্ৰতিৰোধৰ বাবে নতুন নতুন কৌশল ব্যৱহাৰ কৰিব লগা হৈছে। শক্তিশালী কৰিব লগা হৈছে উদ্যান পৰিচালনা।
ৰাষ্ট্ৰীয় উদ্যানখনৰ কাষৰীয় প্ৰতিখন জিলাৰ আৰক্ষী আৰু প্ৰশাসনৰ সৈতে এক সমন্বয়ো গঢ়ি তোলা হৈছে। যাৰ বাবে বিগত দুটা বছৰত গঁড় হত্যা নিয়ন্ত্ৰনত কিছু পৰিমানে সফল হৈছে কাজিৰঙা ৰাষ্ট্ৰীয় উদ্যান কৰ্তৃপক্ষ।
উল্লেখ্য যে ইয়াৰ পুৰ্বে ২০১৬ চনত ১৮ টা, ২০১৭ চনত ৬ টা আৰু ২০১৮ চনত ৭ টা গঁড় কাজিৰঙা ৰাষ্ট্ৰীয় উদ্যানত চোৰাংচিকাৰীয়ে হত্যা কৰিছিল।
বছৰটোত গঁড় হত্যা সংক্ৰান্তত মুঠ ১৭ টা গোচৰ পঞ্জীয়ন কৰি উদ্যান কৰ্তৃপক্ষই ৩৮ জন ব্যক্তিক গঁড় হত্যাৰ গোচৰত আটক কৰিবলৈ সক্ষম হয় বুলি বিভাগীয় সূত্ৰত প্ৰকাশ ৷
ইফালে ২০২০ চনতেই কাজিৰঙা ৰাষ্ট্ৰীয় উদ্যানৰ সপ্তম, অষ্টম আৰু নৱম সংযোজন ঘোষণা কৰা হয়।
লগতে পূৰ্বে ঘোষিত ৰাষ্ট্ৰীয় উদ্যানখনৰ তৃতীয় আৰু পঞ্চম সংযোজনৰ উপৰি দ্বিতীয় আৰু ষষ্ঠ সংযোজন এলেকাৰ একাংশ ভুমিও আনুষ্ঠানিকভাৱে কাজিৰঙাৰ কৰ্তৃপক্ষৰ হাতত হস্তান্তৰিত কৰা হয়।
একেদৰে ২০২০ চনতেই ৰাষ্ট্ৰীয় উদ্যানখনৰ পশ্চিম দিশৰ কলিয়া ভোমোৰা দলঙৰ কাষত পৰ্যটকৰ বাবে নৌকা বিহাৰৰ সুবিধা, নৱ সংযোজিত বান্দৰডুবি অঞ্চলৰ উপৰি চিৰাং পাহাৰৰ ট্ৰেকিং আৰু পানপুৰত পৰ্যটকৰ বাবে ইক’ টুৰিজিম আৰম্ভ কৰা হয়।
যোৱা বছৰটোতে ৰাষ্ট্ৰীয় উদ্যানখনৰ বুঢাপাহাৰৰ বনাঞ্চলৰ পতাহি বিল আৰু দেওচূড়, বাগৰি বনাঞ্চলৰ বান্দৰডুবি আৰু কহঁৰা বনাঞ্চলৰ হালধিবাৰীত জল সংৰক্ষনৰ বাবে বিশেষ প্ৰকল্প শুভাৰম্ভ কৰা হয়।
২০২০ চনতেই গঁড়ৰ ওপৰত তথ্যচিত্ৰ নিৰ্মানৰ বাবেই কাজিৰঙালৈ আহিছিল বিশ্বৰ আগশাৰীৰৰ প্ৰাক্তন ক্ৰিকেটাৰ কেভিন পিটাৰছেন।
তদুপৰি দেশৰ উচ্চতম ন্যায়লয়ৰ ন্যায়ধীশ শৰদ অৰবিন্দ ব‘বডেকে ধৰি ভালেমান বিশিষ্ট ব্যক্তিও কাজিৰঙালৈ আহিছিল।
