১০ ফেব্ৰুৱাৰি নিশা প্ৰায় ১১ মান বজাত তিনিচুকীয়া জিলাৰ পাৱৈস্থ ৩১৫ নং ৰাষ্ট্ৰীয় ঘাইপথত এক ভয়ংকৰ পথ দুৰ্ঘটনা সংঘটিত হয়।
কয়লা পৰিবাহী ট্ৰাক আৰু বলেৰ’ পিক আপ ভ্যানৰ মাজত মুখামুখি সংঘৰ্ষ ফলতে এই দুৰ্ঘটনা সংঘটিত হয় বুলি জানিব পৰা গৈছে।
দুৰ্ঘটনাৰ ফলত বলেৰ’ পিকআপ ভ্যানৰ চালকগৰাকী গুৰুতৰভাৱে আঘাতপ্ৰাপ্ত হয় আৰু তেওঁক প্ৰথমে মাৰ্ঘেৰিটা অসামৰিক চিকিৎসালয়ত ভৰ্তি কৰোৱা হয় যদিও অৱস্থাৰ অধিক অৱনতি ঘটাত ডিব্ৰুগড় চিকিৎসা মহাবিদ্যালয়লৈ লৈ যোৱা হয়।
জানিব পৰা মতে, মাৰ্ঘেৰিটাৰ পৰা তিনিচুকীয়া অভিমুখী কয়লা পৰিবাহী ট্ৰাক আৰু বিপৰীতড দিশৰ পৰা অহা এখন নম্বৰ প্লেট বিহীন বলেৰ’ পিকআপ ভ্যানৰ মাজত মুখামুখি সংঘৰ্ষ হয়।
এই সংঘৰ্ষৰ ফলত বলেৰ’ পিকআপ ভ্যানখনৰ সন্মুখভাগ সম্পূৰ্ণৰূপে বিধ্বস্ত হয়।
বলেৰ’ পিকআপ ভ্যানৰ চালকজন গুৰুতৰভাৱে আঘাতপ্ৰাপ্ত হৈ গাড়ীৰ ভিতৰতে আৱদ্ধ হৈ থাকে।
উদ্ধাৰকাৰী সকলে বহু কষ্ট কৰি চালকজনক গাড়ীৰ পৰা বাহিৰলৈ উলিয়াই আনি অতি সংকট জনক অৱস্থাত চিকিৎসালয়লৈ প্ৰেৰণ কৰে।
দুৰ্ঘটনাটোত বলেৰ’ পিক আপ ভ্যানখনৰ হেণ্ডিমেনজনো কিছু পৰিমানে আঘাতপ্ৰাপ্ত হয়।
উল্লেখযোগ্য যে, ট্ৰাকখনৰ কয়লাখিনি বৈধ নে অবৈধ জানিব পৰা হোৱা নাই যদিও অবৈধ বুলিয়ে সন্দেহ কৰা হৈছে।
এ এছ-০১ কিউ ৮৫১৭১ নম্বৰৰ ট্ৰাকখনৰ চালক আৰু হেণ্ডিমেন গৰাকীয়ে দুৰ্ঘটনা সংঘটিত কৰিয়ে ঘটনাস্থলীৰ পৰা পলায়ন কৰে।
আনহাতে, ঘটনাস্থলীত ডিগবৈ আৰক্ষীৰ দল উপস্থিত হৈ তদন্ত আৰম্ভ কৰিছে।
ইয়াৰ পূৰ্বেও ২০১৯ চনৰ ২৫ নবেম্বৰত একেটা স্থানতে কয়লা ভৰ্তি ট্ৰাকে মহটিয়াই নিয়াৰ ফলত চাৰিজন লোকৰ থিতাতে মৃত্যু হৈছিল।
উক্ত স্থানত থকা লাইন হোটেল সমূহত আইন-শৃংখলা অমান্য কৰি শাৰী শাৰীকৈ ট্ৰাক সমূহ ৰখাই থোৱাৰ বাবেই দুৰ্ঘটনা সংঘটিত হৈ অহা বুলি স্থানীয় লোকে অভিযোগ কৰি আহিছে।
চোৰাং তেলৰ ঘাটি স্বৰূপ এই লাইন হোটেল সমূহৰ বিৰুদ্ধে কোনোধৰণৰ ব্যৱস্থা নোলোৱাৰ বাবেই মৰণফাণ্ডলৈ পৰিণত হোৱা বুলি অঞ্চলটোৰ ৰাইজে কৈ আহিছে।
আনহাতে, নিশা উক্ত দুৰ্ঘটনাস্থলীত দুৰ্ঘটনা সংঘটিত হোৱা ট্ৰাকখনে এখন স্কুটিক মহটিয়াই নিয়াৰ ফলত স্কুটি চালকজনো আঘাতপ্ৰাপ্ত হয়।
আঘাতপ্ৰাপ্ত স্কুটি চালক জনকো মাৰ্ঘেৰিটা অসামৰিক চিকিৎসালয়লৈ প্ৰেৰণ কৰা হয়।