গোৱালপাৰা জিলাত আজি সংঘটিত এক মৰ্মান্তিক পথ দুৰ্ঘটনাত দুজন লোকে প্ৰাণ হেৰুৱাৰ লগতে আন ৬ জন গুৰুতৰভাৱে আহত হয়। গোৱালপাৰা নগৰৰ পৰা প্ৰায় ২ কি মি নিলগৰ শ’লমাৰি আৰু ভালুকদুবীৰ মাজত উক্ত শোকাৱহ পথ দুৰ্ঘটনাটো সংঘটিত হয়।
আৰক্ষীৰ সূত্ৰই জনোৱা মতে, আজি দিনৰ প্ৰায় ১১:৩০ বজাত গোৱালপাৰা নগৰৰ হাছিলাপাৰাৰ পৰা ধুবুৰী অভিমুখে যাত্ৰা আৰম্ভ কৰা এ এছ-১৭ -৯৩১৩ নম্বৰৰ যাত্ৰীবাহী বাছখনে বিপৰীত দিশৰ পৰা আহি থকা এখন যাত্ৰীভৰ্তী টেম্প’ক খুন্দা মাৰে।
উল্লেখযোগ্য যে বাছখনৰ খুন্দা ইমান প্ৰবল আছিল যে টেম্প’খনৰ সন্মুখভাগ সম্পূৰ্ণৰূপে বিধ্বস্ত হৈ পৰাৰ লগতে টেম্পখনৰ চালক দেবজিৎ সৰকাৰ (৩২) আৰু আগৰ ছিটত বহি অহা স্থানীয় যাত্ৰী ধৰণীধৰ ৰাভা থিতাতে মৃত্যু হয়।
আনহাতে গুৰুতৰভাৱে আহত ৪ গৰাকী যাত্ৰীক বেডিলা মোমিন, অনিল ছাংমা, ভাগ্যেশ্বৰ ৰাভা আৰু ফজল হ’ক বুলি চিনাক্ত কৰা হৈছে যদিও আন দুগৰাকীক বাতৰি লিখা পৰলৈকে চিনাক্ত কৰিব পৰা হোৱা নাই।
দুৰ্ঘটনাৰ খবৰ লাভ কৰা মাত্ৰকে স্থানীয় আৰক্ষী ঘটনাস্থলীত উপস্থিত হৈ আটাইকেইজনকে সমীপৰ চিকিৎসালয়ত ভৰ্তি কৰায়।
এইখিনিতে মন কৰিবলগীয়া যে কৃষ্ণাই নগৰৰ সমীপৰ ৩৭ নং ৰাষ্ট্ৰীয় ঘাইপথত থকা কৃষ্ণাই নৈৰ ওপৰৰ আৰ চি চি দলংখনত যোৱা মে’ মাহতে ফাঁট ধৰা পৰাত তেতিয়াৰ পৰাই কৃষ্ণাই হৈ যোৱা বাছ বিলাক গোৱালপাৰা নগৰৰ মাজেৰে অহা কৰি আছে।
যাৰ ফলত গোৱাৰপাৰা নগৰৰ পৰা মৰনৈ সৈনিক স্কুল হৈ দুধনৈ যোৱা পথটোত অত্যাধিক যান-যঁট সৃষ্টি হোৱাৰ লগতে পথছোৱাত পথ-দুৰ্ঘটনাৰ সংখ্যাও বাঢ়ি গৈছে। আজি সংঘটিত পথ-দুৰ্ঘটনাটোক ইয়াৰে পৰিনাম বুলি উল্লেখ কৰি স্থানীয় লোকসকলে শীঘ্ৰে দলংখন মেৰামতী কৰি মুকলি কৰিবলৈ দাবী জনায়।