আজি পুৱতি নিশা উত্তৰ গুৱাহাটীৰ জয়গুৰু অঞ্চলত সংঘটিত হয় এক ভয়ংকৰ পথ দুৰ্ঘটনা। দুৰ্ঘটনাটোত এগৰাকী যুৱতীৰ লগতে দুজন যুৱকে প্ৰাণ হেৰুওৱা ঘটনাই শোকস্তব্ধ কৰি তুলিছে অঞ্চলটোৰ ৰাইজক।
ঘটনা সন্দৰ্ভত জানিব পৰা মতে, এখন AS-01-BN-1574 নম্বৰৰ চুইফট ডিজায়াৰ বাহনে নিয়ন্ত্ৰন হেৰুৱাই পথৰ কাষৰ পিটনিত সোমাই পৰাৰ ফলতে এই ভয়ংকৰ দুৰ্ঘটনাটো সংঘটিত হয়।
দুৰ্ঘটনা সংঘটিত অঞ্চলৰ স্থানীয় লোকে জনোৱা অনুসৰি বাহনখন গুৱাহাটীৰ পৰা বাইহাটা অভিমুখে আহি আছিল।
এই শোকাৱহ পথ দুৰ্ঘটনাটোত মৃত্যুক আকোৱালি লোৱা লোক কেইজনৰ ভিতৰৰ যুৱতীগৰাকী গুৱাহাটীৰ কাহিলীপাৰাৰ মধুস্মিতা শৰ্মা, চালকজন নলবাৰীৰ তপন শৰ্মা আৰু আনজন দিচপুৰৰ গোবিন্দ বৈশ্য বুলি জানিব পৰা গৈছে।
ইয়াৰে গোবিন্দ বৈশ্য হ’ল ছুইফট ডিজায়াৰ বাহনখনৰ গৰাকী।
জানিব পৰা মতে দুৰ্ঘটনা সংঘটিত হোৱাৰ কিছু সময় পিছতেই ঘটনাস্থলত উত্তৰ গুৱাহাটী আৰক্ষী উপস্থিত হৈ মৃতদেহ কেইটা থানালৈ লৈ আহে।
