বাংলাদেশত আশ্ৰয় লৈ থকা ৰহিঙীয়াসকল এটা “আঞ্চলিক ভাবুকি” বুলি মন্তব্য শ্বেইখ হাছিনাৰ
ম্যানমাৰত সেনা আৰু বৌদ্ধ নাগৰিকৰ উৎপীড়নৰ বলি হৈ বাংলাদেশলৈ পলাই অহা ১০লাখৰো অধিক ৰহিঙীয়াক “এটা আঞ্চলিক ভাবুকি” বুলি মন্তব্য কৰিছে প্ৰধান মন্ত্ৰী শ্বেইখ হাছিনাই।
১১ নৱেম্বৰত ঢাকা গ্ল’বেল ডায়েলগ উদ্বোধন কৰাৰ সময়ত হাছিনাই ৰহিঙীয়া সংকটটো কেৱল বাংলাদেশৰ নহয়, গোটেই অঞ্চলটোৰ এটা সংকট হিচাপে চিহ্নিত কৰে আৰু সকলোকে এই সংকট নিৰাময় কৰাৰ বাবে আহ্বান জনায়।
“সামৰিক নৃশংসতাৰ বলি হৈ বাংলাদেশলৈ পলাই অহা ৰহিঙীয়াসকল কেৱল বাংলাদেশৰ বাবেই ভাবুকি নহয়, লগতে ই আঞ্চলিক নিৰাপত্তাৰ প্ৰতিও ভাবুকি”, বিডি নিউজ টুৱেণ্টি ফ’ৰত প্ৰধান মন্ত্ৰীগৰাকীৰ উদ্ধৃতি।
২০১৭ চনত ঘটা উৎপীড়নৰ ঘটনাটোৰ সময়ত পলাই অহা প্ৰায় ৭ লাখ ৰহিঙীয়া এতিয়াও বাংলাদেশত আছে।
প্ৰধান মন্ত্ৰীগৰাকীয়ে যোৱা ছেপ্টেম্বৰত নিউয়ৰ্কত হোৱা ৰাষ্ট্ৰসংঘৰ সাধাৰণ সভাৰ মজিয়াতো ৰহিঙীয়া সমস্যাটো দাঙি ধৰিছিল।
উল্লেখ কৰিব পাৰি যে নিপীড়িত ৰহিঙীয়াসকলক পৰ্য্যায়ক্ৰমে ঘূৰাই ল’বলৈ ম্যানমাৰে বাংলাদেশৰ সৈতে এখন চুক্তি কৰিছিল যদিও প্ৰক্ৰিয়াটো মসৃণভাৱে আগ বঢ়া নাই।
চুক্তি অনুসৰি, শৰণাৰ্থীসকলক প্ৰত্যাৱৰ্তন কৰাৰ বাবে সেউজ সংকেত প্ৰদান কৰা হৈছে যদিও ম্যানমাৰৰ অশান্তিজৰ্জৰ ৰাখিনি ৰাজ্যখনলৈ উভতি যোৱাৰ বাবে বহুতেই অস্বীকাৰ কৰিছে।
বাংলাদেশে প্ৰায় ১০ লাখ ৰহিঙীয়াক আশ্ৰয় দিছে। ম্যানমাৰৰ সৈতে দক্ষিণ-পূব সীমাত থকা অস্বাস্থ্যকৰ শিবিৰত ৰহিঙীয়াসকলে জীৱন কটাইছে।
১১ নৱেম্বৰত হাছিনাই দোহাৰে, “মই ভাবো এই সমস্যাটো সোনকালে সমাধান কৰিব লাগে। মই আন্তঃৰাষ্ট্ৰীয় সম্প্ৰদায়ক এই সমস্যা সমাধান কৰিবলৈ আহ্বান জনাইছো।”
আৰ্থ-সামাজিক উন্নতি, নিৰাপত্তা আৰু শান্তিৰ বাবে হাছিনাই এছিয়ান পেচিফিক ৰিজনৰ দেশবোৰৰ মাজত সহযোগিতা বৃদ্ধি কৰিবলৈ জোৰ দিয়ে।
তেওঁ অঞ্চলটোৰ দেশবোৰৰ মাজত থকা দৰিদ্ৰতা নিৰ্মূল সহযোগিতাৰ মাজেৰে সম্ভৱ হ’ব বুলি দাবী কৰে প্ৰধান মন্ত্ৰী হাছিনাই।