পঞ্জাৱৰ অমৃতসৰত আজি ১০২ কিলোগ্ৰাম পৰিমাণৰ হিৰোইন জব্দ কৰিছে শুল্ক বিভাগে। পাকিস্তান চেক পোষ্টৰ জৰিয়তে আফগানিস্তানৰ পৰা অহা এখন ট্ৰাকৰ পৰা প্ৰায় ৭০০ কোটি টকাৰ ড্ৰাগছখিনি জব্দ কৰে বিভাগে।
দিল্লীৰ কোনো অচিনাক্ত অবৈধ ব্যৱসায়ীয়ে আফগানিস্তানৰ পৰা আমদানি কৰা এই বৃহৎ পৰিমাণৰ ড্ৰাগছখিনি মুলেথিৰ মাজত লুকুৱাই অনা অৱস্থাত ধৰা পেলোৱা হয়।
নিৰ্ধাৰিত পৰীক্ষা প্ৰক্ৰিয়া অনুসৰি এক্স-ৰে স্কেনিং কৰাৰ পিছত এই বৃহৎ কাৰচাজি পোহৰলৈ আহে। এক্স-ৰে ছবিত এক্স-ৰে ছবিত দেখা দিয়া সন্দেহজনক ছবিৰ প্ৰতি লক্ষ্য ৰাখি শুল্ক বিভাগৰ বিষয়াসকলে বেগবোৰ পৰীক্ষা কৰে।
বেগবোৰ পৰীক্ষাৰ সময়ত বিভাগে বেগৰ ভিতৰত কিছুমান সৰু নলাকাৰ কাঠৰ টুকুৰা উদ্ধাৰ কৰে। এই কাঠত টুকুৰাবোৰৰ দুয়োটা মূৰ আঠাযুক্ত সামগ্ৰীৰে বন্ধ কৰি অনা হৈছিল।
সন্দেহবশত: এই কাঠৰ টুকুৰাবোৰ ভাঙি দিয়াৰ পিছত ইয়াৰ ভিতৰৰ পৰা পাউদাৰ জাতীয় সামগ্ৰীৰে ভৰ্তি কিছুমান পেকেট উদ্ধাৰ কৰা হয়।
শুল্ক আৰু সীমান্ত সুৰক্ষা বাহিনীয়ে এই সামগ্ৰী সমূহ ড্ৰাগছ চিনাক্তকৰণ পৰীক্ষা কিটৰ দ্বাৰা পৰীক্ষা কৰাৰ পিছত এইসমূহ হিৰোইন বুলি চিনাক্ত কৰা হয়।
ইতিমধ্যে এই সন্দৰ্ভত অধিক তদন্ত চলি আছে বুলি শীৰ্ষ বিষয়াসকলে জানিবলৈ দিছে।
উল্লেখ্য যে ২০১৯ চনৰ জুনত আফগানিস্তান পৰা আমদানি কৰা প্ৰায় ৫৩২.৬৩ কিলোগ্ৰাম ড্ৰাগছ আটাৰীত জব্দ কৰিছিল অমৃতসৰ শুল্ক বিভাগে।
