কাৰাগাৰত থকাৰ সময়তে বিতৰ্কিত আৰ.টি.আই কৰ্মী দুলাল বৰাৰ ফেইচবুক একাউন্টৰ পৰা এখন ফটো আপলোড হয়।
ফটোখনত আৰ.টি.আই কৰ্মী দুলাল বৰাৰ হাতত হেণ্ডকাফ লগাই থোৱা অৱস্থাত দেখিবলৈ পোৱা গৈছে।
আজি আবেলি প্ৰায় ৪.৩০ মান বজাত বৰাৰ একাউন্টৰ আপলোড কৰা হৈছে ফটোখন।
কাৰাগাৰত থকাৰ সময়তে তেওঁৰ একাউন্টৰ পৰা কোনে আৰু কেনেকৈ ফটোখন আপলোড কৰিলে সেই কথা জানিব পৰা হোৱা নাই।
অৱশ্যে এই বিষয়ে মহানগৰ আৰক্ষী অৱগত নহয়। আমাৰ সাংবাদিকে মহানগৰ আৰক্ষী আয়ুক্ত মুন্না প্ৰসাদ গুপ্তাক এই সম্পৰ্কে সোধাত তেওঁ বিষয়টো দৃষ্টিগোচৰ হোৱা নাই বুলি সদৰী কৰে।
প্ৰশ্ন হ’ল, কাৰাগাৰত থকাৰ সময়ত কেনেকৈ ইণ্টাৰনেট সেৱা ব্যৱহাৰ কৰিব পাৰিলে বৰাই? নাইবা কোনো দুস্কৃতিকাৰীয়ে বৰাৰ ফেইচবুক একাউন্ট হেক কৰি এই ফটো আপলোড কৰিছে নেকি?
উল্লেখযোগ্য যে, কামৰূপৰ যান-বাহন পৰিদৰ্শক নাইমুদ্দিন আহমেদে যোৱা ৪ ডিচেম্বৰৰ দিনা বৰাৰ বিৰুদ্ধে ধন দাবীৰ অভিযোগ তুলি হাতীগাওঁ থানাত গোচৰ তৰিছিল। তাৰ পাছতে যোৱা ৭ ডিচেম্বৰৰ দিনা হাতীগাওঁ আৰক্ষীয়ে গ্ৰেপ্তাৰ কৰিছিল দুলাল বৰাক।
ইফালে কাৰ্বিআংলং জিলাৰ ডিফু থানাত জলসিঞ্চন বিভাগৰ অতিৰিক্ত মুখ্য অভিযন্তা জয়বিনন লাংমাইয়ে বৰাৰ বিৰুদ্ধে এজাহাৰ দাখিল কৰিছিল।
ইতিমধ্যে আৰক্ষীয়ে ব্লেক মেইলিঙৰ অভিযোগত ৰঙাঘৰৰ ভাত খাই থকা RTI কৰ্মী দুলাল বৰাৰ বাসগৃহৰ পৰা চি আই ডিয়ে ১১ জানুৱাৰিত প্ৰায় ৩৫ লাখ টকা মূল্যৰ এখন গাড়ী জব্দ কৰিছিল।
বৰাই বিশেষকৈ বন বিভাগৰ বহু বিষয়াক দীৰ্ঘ দিনৰ পৰা ব্লেকমেইলিং কৰি নিয়মীয়াকৈ ধন লাভ কৰি অহাৰ কথা তদন্তত পোহৰলৈ আহিছে।
