গুৱাহাটীৰ তৰুণৰাম ফুকন ইনড’ৰ ষ্টেডিয়ামত শনিবাৰ অৰ্থাৎ ১৬ ফেব্ৰুৱাৰিত সামৰণি পৰা ৮৩ সংখ্যক ছিনিয়ৰ ৰাষ্ট্ৰীয় বেডমিণ্টন প্ৰতিযোগিতাৰ মহিলাৰ ছিংগলছত ছাইনা নেহৱালে আৰু পুৰুষৰ ছিংগলছত সৌৰভ বাৰ্মাই খিতাপ দখল কৰিবলৈ সক্ষম হয়।
ৰাষ্ট্ৰীয় বেডমিণ্টন প্ৰতিযোগিতাখনৰ মহিলাৰ ফাইনেলত শনিবাৰে পৰস্পৰৰ মুখামুখি হৈছিল ভাৰতৰ দুই আগশাৰীৰ শ্বাটলাৰ তথা বৰ্তমানৰ বিশ্বৰ দ্বিতীয়স্থানত থকা পি ভি সিন্ধু আৰু ডিফেণ্ডিং ছাইনা নেহৱাল।
প্ৰতিযোগিতাখনত ছাইনা নেহৱালে পি বি সিন্ধুক ২১-১৮, ২১-১৫ গেমত পৰাস্ত কৰে। একেদৰে পুৰুষৰ ফাইনেলত সৌৰভ বাৰ্মাই লক্ষ্য সেনক ২১-১৮, ২১-১৩ গেমত পৰাস্ত কৰে।
আনহাতে, পুৰুষ ডাবলছত প্ৰণৱ জেৰী চোপ্ৰা আৰু ছিৰাগ চেটীৰ যুটিয়ে অৰ্জুন এম আৰ শ্লোক ৰামচন্দ্ৰনক ২১-১৩, ২২-২০ গেমত পৰাস্ত কৰি চেম্পিয়ন হয়। মিক্সড ডাবলছত মনু আট্ৰি আৰু মনীষা কেৰ যুটিয়ে ৰোহন কাপোৰ আৰু কুণ্ডু গাৰ্গক ১৮-২১, ২১-১৭, ২১-১৬ গেমত পৰাস্ত কৰি খিতাপ জয় কৰে।
তদুপৰি মহিলাৰ ডাবলছত মেঘনা জাকামপুৰি আৰু পৰবিছা ৰামৰ যুটিক শিখা গৌতম আৰু অশ্বিনী ভাটৰ যুটিয়ে ২১-১৬, ২২-২০ গেমত পৰাস্ত কৰি চেম্পিয়ন হয়।
৮৩ সংখ্যক ছিনিয়ৰ ৰাষ্ট্ৰীয় বেডমিণ্টন প্ৰতিযোগিতাখনৰ বঁটাসমূহ বিতৰণ কৰে মুখ্য মন্ত্ৰী সৰ্বানন্দ সোণোৱাল আৰু বিত্তমন্ত্ৰী তথা ভাৰতীয় বেডমিণ্টন সন্থাৰ সভাপতি হিমন্ত বিশ্ব শৰ্মাই।
