মহাকুম্ভ মেলাত অহিন্দু খাদ্যৰ দোকান খুলিব নোৱাৰিব। হৰিদ্বাৰৰ পৰা অহা সন্তসকলৰ শিখৰতম অখিল ভাৰতীয় আখৰা পৰিষদৰ এটা দলে এই সতৰ্কবাণী দিলে। মন কৰিবলগীয়া যে অহা বছৰ মকৰ সংক্ৰান্তিৰ পৰা প্ৰয়াগৰাজ (পূৰ্বৰ এলাহাবাদ)ত মহাকুম্ভ আৰম্ভ হ’ব।
নিৰঞ্জনী আখৰাৰ মুৰব্বী ৰবীন্দ্ৰ পুৰীয়ে কয় যে শেহতীয়াকৈ প্ৰয়াগৰাজত অখিল ভাৰতীয় আখৰা পৰিষদৰ বৈঠকত এই সিদ্ধান্ত লোৱা হৈছে। পুৰীয়ে কয়, এতিয়া চৰকাৰে সিদ্ধান্ত ল’ব কোনে দোকান খুলিব পাৰে। কুম্ভমেলাত যদি অহিন্দুসকলে খাদ্য বিক্ৰী কৰে তেন্তে সনাতন ধৰ্মৰ অনুগামীসকল নীৰৱ দৰ্শক নহ’ব বুলি তেওঁ সকীয়াই দিয়ে। নগা সন্ন্যাসীয়ে তেওঁলোকক শাস্তি দিব।
পুৰীয়ে লগতে কয় যে নিৰাপত্তাৰ দৃষ্টিকোণৰ পৰা মহাকুম্ভলৈ অহা তীৰ্থযাত্ৰীসকলক মেলাত প্ৰৱেশ কৰাৰ পূৰ্বে চিনাক্ত কৰিব লাগে। আমি স্পষ্টকৈ ক’ব বিচাৰো যে কোনো মুছলমানে মেলা চৌহদত দোকান বা তেনেকুৱা কিবা খুলিব নোৱাৰে। পুৰীয়ে কয় যে দেৱালীৰ সময়ত উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ সৈতে কথা পতাৰ অন্তত চূড়ান্ত সিদ্ধান্ত লোৱা হ’ব।
তেওঁ আৰু কয় যে, ইচ্ছাকৃতভাৱে ফলৰ ৰস, ফলমূল আৰু অন্যান্য খাদ্য বিক্ৰী কৰা কিছুমান লোকৰ বিৰুদ্ধে কঠোৰ অনুশাসনমূলক ব্যৱস্থা গ্ৰহণ কৰা উচিত। নিৰঞ্জনী আখৰাৰ কঠোৰ বিৰোধী মহানিৰ্বাণী আখৰাই মহাকুম্ভ অঞ্চলত কোনো সংখ্যালঘু লোকক খাদ্যৰ দোকান খুলিবলৈ দিব নালাগে বুলি দাবী জনাইছে।
নিৰ্মোহী আখৰাৰ মুৰব্বী মহন্ত ৰাজেন্দ্ৰ দাসেও একে মতামত প্ৰকাশ কৰে। তেওঁ ক’লে, হিন্দুসকল মুছলমানৰ পবিত্ৰ স্থানলৈ যায় নেকি? যদি নাযায়, তেন্তে মহাকুম্ভত ব্যৱসায় কৰিবলৈ কিয় আহিব! কিন্তু সনাতন ধৰ্মত বিশ্বাস কৰি পৱিত্ৰ গংগমাৰ পানীত ডুব মাৰিলেও কোনেও আপত্তি নকৰে। মহামণ্ডলেশ্বৰ স্বামী হৰিচেতনানন্দই কয় যে এনে কোনো সিদ্ধান্ত লোৱাৰ বিষয়ে তেওঁ অৱগত নহয়।
