ভাৰতত সমলিংগ বিবাহক আইনী স্বীকৃতি প্ৰদান কৰা হ’ব নহয় সেই বিষয়ে সমগ্ৰ দেশবাসীৰে উৎকণ্ঠা বৃদ্ধি পাইছে। উচ্চতম ন্যায়ালয়ৰ পাঁচজন ন্যায়াধীশৰ সংবিধান বিচাৰপীঠে সমলিংগ বিবাহক আইনী স্বীকৃতি প্ৰদান সম্পৰ্কীয় দুখন আবেদন শুনানি গ্ৰহণ কৰি আছে। অতি শীঘ্ৰেই দেশৰ সৰ্বোচ্চ ন্যায়ালয়ে এই সম্পৰ্কীয় চূড়ান্ত ৰায় প্ৰদান কৰিব।
কিন্তু তিনিখন ৰাজ্যৰ বাহিৰে দেশৰ প্ৰায়বোৰ ৰাজ্যৰ চৰকাৰ আৰু কেন্দ্ৰীয় চৰকাৰে সমলিংগ বিবাহৰ আইনী স্বীকৃতি প্ৰদানৰ বিৰুদ্ধে অৱস্থান গ্ৰহণ কৰিছে। তাৰ মাজতো মুখ্য ন্যায়াধীশ ডি ৱাই চন্দ্ৰচূড়ে সমলিংগ বিবাহৰ আইনী স্বীকৃতি বিচৰাসকলৰ আশাৰ সঞ্চাৰ কৰিছে। অৱশ্যে ন্যায়ালয়ে কি ৰায় দিয়ে সেয়া এতিয়াও স্পষ্ট হোৱা নাই।
কিন্তু দেশত এই সম্পৰ্কে উত্তেজনা আৰু উৎকণ্ঠা বিৰাজ কৰি থকাৰ মাজতে আমি আপোনালোকক জনাব খুজিছো সমলিংগ বিবাহক আইনী স্বীকৃতি প্ৰদান কৰা দেশসমূহৰ বিষয়ে।
উল্লেখ্য যে এই সময়লৈকে বিশ্বৰ ৩৪ খন দেশে সমলিংগ বিবাহক স্বীকৃতি প্ৰদান কৰিছে। এই তালিকাত শেহতীয়াভাৱে সংযোজন হোৱা দেশখন হ’ল এণ্ডোৰা। ইফালে অহা বছৰত আৰু এখন দেশত এই বিবাহে আইনী স্বীকৃতি লাভ কৰিব। আইনী স্বীকৃতি লাভ কৰিবলগীয়া দেশখন হ’ল ইষ্ট’নিয়া।
এই বিবাহে বৈধতা লাভ কৰা অন্যান্য দেশসমূহ হৈছে —
আৰ্জেণ্টিনাঃ ২০১০ চনত সমলিংগ বিবাহ বৈধ কৰা হৈছিল।
মেক্সিকোঃ ২০১০ চনত ফেডাৰেল ডিষ্ট্ৰিক্ট (মেক্সিকো চহৰ)ত সমলিংগ বিবাহ বৈধতা প্ৰদান কৰা হৈছিল।
যুক্তৰাজ্যঃ ২০১৪ চনত সমলিংগ বিবাহ বৈধতা প্ৰদান কৰা হয়।
স্কটলেণ্ডঃ ২০১৪ চনত সমলিংগ বিবাহ বৈধতা প্ৰদান কৰা হয়।
অষ্ট্ৰেলিয়াঃ ২০১৭ চনত সমলিংগ বিবাহক বৈধতা প্ৰদান কৰা হৈছিল।
জাৰ্মানীঃ ২০১৭ চনত সমলিংগ বিবাহ বৈধতা প্ৰদান কৰা হয়।
উত্তৰ আয়াৰলেণ্ডঃ ২০২০ চনত সমলিংগ বিবাহ বৈধতা প্ৰদান কৰা হয়।
২০১৫ চনৰ ৯ জুলাইৰ পৰা সমগ্ৰ আমেৰিকাত বিবাহিত সমলিংগ দম্পতীয়ে বিবাহিত বিপৰীত লিংগ দম্পতীয়ে পোৱা সকলো ফেডাৰেল সুবিধাৰ সমান সুবিধা লাভ কৰিছে।
বিবাহৰ বাহিৰেও অন্য আইনী স্বীকৃতি থকা ৩৫ খন দেশ আছে।
চিভিল ইউনিয়ন (চিভিল পাৰ্টনাৰশ্বিপ বুলিও জনা যায়) হৈছে বিবাহৰ দৰেই আইনীভাৱে স্বীকৃতিপ্ৰাপ্ত ব্যৱস্থা, যিটো মূলতঃ সমলিংগ দম্পতীৰ বাবে আইনী স্বীকৃতি প্ৰদানৰ উপায় হিচাপে সৃষ্টি কৰা হৈছে। এই ব্যৱস্থাৰে আমেৰিকাই এনে দম্পতী সকলো অধিকাৰ প্ৰদান কৰে।
আইনী স্বীকৃতি থকা কিছুমান দেশ হ’ল-
ডেনমাৰ্কঃ ১৯৮৯ চনত সমলিংগ দম্পতীৰ আইনী স্বীকৃতি দিয়া প্ৰথমখন দেশ হৈছে ডেনমাৰ্ক।
ব্ৰাজিলঃ ২০০২ চনত এনে দম্পতীৰ বাবে আইনী স্বীকৃতি প্ৰদান কৰা হৈছিল।
এণ্ডোৰাঃ ২০১৪ চনত সমলিংগ দম্পতীৰ বাবে আইনী স্বীকৃতি প্ৰদান কৰা হৈছিল।
চিলিঃ ২০১৫ চনত চিলিয়ে সমলিংগ দম্পতীৰ বাবে আইনী স্বীকৃতি প্ৰদান কৰে।
ইষ্ট’নিয়াঃ ২০১৬ চনত সমলিংগ দম্পতীৰ বাবে আইনী স্বীকৃতি প্ৰদান কৰা হয়।
জাপানঃ ২০২১ চনৰ পূৰ্বে কিছুমান পৌৰ প্ৰশাসনে সমলিংগ দম্পতীৰ বাবে আইনী স্বীকৃতি প্ৰদান কৰা হৈছিল।
স্লোভেনিয়াঃ ২০১৭ চনত সমলিংগ দম্পতীৰ বাবে আইনী স্বীকৃতি প্ৰদান কৰা হৈছিল।
