বুধবাৰে গুৱাহাটীত উপস্থিত হৈ নৰ্মদা বচাও আন্দোলনৰ নেত্ৰী মেধা পাটকাৰ আৰু আছা ফৰ এডুকেশ্যন বঁটাপ্ৰাপক সণ্ডীপ পাণ্ডেই আছুৰ আন্দোলন প্ৰণালীক সমালোচনা কৰি ‘চৰকাৰী পক্ষ হৈ আছুৱে কা বিৰোধী আন্দোলন কৰিছে’ বুলি মন্তব্য কৰাৰ পাছতে দুয়োগৰাকীকে উভটি ধৰিছে সদৌ অসম ছাত্ৰ সন্থাৰ উপদেষ্টা ড০ সমুজ্জ্বল কুমাৰ ভট্টাচাৰ্য্য আৰু সাধাৰণ সম্পাদক লুৰিণজ্যোতি গগৈয়ে।
দুয়োগৰাকীকে সমালোচনা কৰি আছুৰ উপদেষ্টাগৰাকীয়ে কয়, ‘মেধা পাটকাৰ আৰু সণ্ডীপ পাণ্ডেৰ মন্তব্য দায়িত্বজ্ঞানহীন আৰু টুলুঙা। অসমৰ জনসাধাৰণ সদৌ অসম ছাত্ৰ সন্থাৰ অভিভাৱক। পাটকাৰ আৰু পাণ্ডে ছাত্ৰ সন্থাৰ অভিভাৱক নহয়।‘
ইয়াৰ উপৰি ‘কা’ বিৰোধী আন্দোলনত চৰকাৰৰ গুলীত ফুলকুমলীয়া ছাত্ৰকে ধৰি পাঁচজনকৈ চহিদ হৈছে বুলি সদৰী কৰি ভট্টাচাৰ্য্যই লগতে কয় ‘কেইবা শতাধিক আটক হৈছে, বহুজনৰ ওপৰত নিৰ্য্যাতন চলোৱা হৈছে। চৰকাৰৰ মতে আন্দোলন চলোৱা বুলি কৈ দুয়োগৰাকীয়ে চহিদৰ লগতে অসম আৰু উত্তৰ-পূৰ্বাঞ্চলৰ জনসাধাৰণৰ অহিংস আন্দোলনক চুড়ান্ত অপমান কৰিছে।‘
ইপিনে, উত্তপ্ত তথা অগ্নিগৰ্ভা পৰিস্থিতিৰ নিয়ন্ত্ৰণ কৰিবলৈহে সন্ধিয়া ৫ বজাৰ পৰা আন্দোলন স্থগিত হোৱা বুলি উল্লেখ কৰে ভট্টাচাৰ্য্যই।
তেওঁ কয় ‘যোৱা ১০ ডিচেম্বৰৰ পৰা ১২ ডিচেম্বৰলৈকে যি উত্তপ্ত পৰিস্থিতিৰ সৃষ্টি হৈছিল তাৰ পাছৰে পৰা ছাত্ৰ সন্থাই আন্দোলনত অহিংস আৰু শৃংখলাবদ্ধভাৱে আগুৱাই নিয়াৰ লক্ষ্যৰে সন্ধিয়া ৫ বজাৰ পৰা সাত দিনৰ বাবে সাময়িকভাৱে আন্দোলন স্থগিত ৰাখিছিল। তাৰ পাছৰে পৰা অসমৰ ৰাইজৰ অভিভাবকত্বত ছাত্ৰ সন্থা আৰু ৰাইজৰ আন্দোলন যিকোনো সময়তে খেলপথাৰ, ৰাজপথ সকলোতে সমানেই অহিংস আৰু শৃংখলাবদ্ধভাৱে চলি আছে।‘
আনহাতে, দুয়োগৰাকীকে সমালোচনা কৰি আছুৰ সাধাৰণ সম্পাদক লুৰিণজ্যোতি গগৈয়ে কয় ‘তেওঁলোকে প্ৰমাণ কৰক আমি এই ‘কা’ বিৰোধী সংগ্ৰাম চৰকাৰৰ লগত জৰিত হৈ কৰিছো। তেওঁলোকৰ কথাই প্ৰমাণ কৰি দিলে তেওঁলোকৰ জ্ঞানশূণ্যতা। অসমত ২০১৫ চনৰ পৰা চলি থকা সংগ্ৰামৰ ধাৰা গতিবিধি আৰু স্বৰূপ আৰু জনগণৰ নিৰবিচ্ছিন্ন প্ৰতিবাদৰ নুন্যতম জ্ঞান নথকাটোৱেই প্ৰতিফলিত কৰিছে।‘
‘কোনোবা নিৰ্দিষ্ট ব্যক্তিৰ দালাল বা এজন্টে হৈ তেওঁলোকে এই কথাবোৰ কৈছে সেই কথা স্পষ্ট হৈ পৰিছে। গণসংগ্ৰামক বিধি পথালি দিয়াৰ নিচিনা কথা ক’ব, তেওঁলোক চৰকাৰৰ লগত যে জৰিত সেই কথা প্ৰমাণ কৰিছে। এই কথাই গণসংগ্ৰামৰ ধাৰাক কেতিয়াও শক্তিশালী নকৰে। ই মানুহৰ মাজত ভাঙোনমুখী পৰিৱেশ আনিব কাৰণ তেওঁলোকে চৰকাৰৰ এজেন্ট হৈ এই কাম কাজ কৰিছে।‘ লুৰিণে সংবাদ মাধ্যমৰ আগত এইদৰে কয়।
লুৰিণে পাটকাৰ আৰু পাণ্ডেক কটাক্ষ কৰি কয় ‘নৰ্মদা আৰু লোকপাল আন্দোলন কৰিছিল এতিয়া সেই আন্দোলনবোৰ কি হ’ল? সেই আন্দোলনবোৰ কেনেকৈ মেনেজ হ’ল সেই কথা ভাৰত বা অসমৰ মানুহে জানে।‘
