‘বেটী বচাও, বেটী পঢ়াও’ শীৰ্ষক শ্ল’গান এতিয়া কেৱল কাগজে-পোষ্টাৰেই চৰ্চিত। এই শ্ল’গান আওৰাই দেশৰ কন্যা সকলক আগুৱাই নিয়াৰ যি স্বপ্ন ৰখা দেখুওৱা হৈছে, সেই স্বপ্নৰ সম্পূৰ্ণ পৃথক এক পৰিস্থিতিহে এতিয়া সমাজত বিদ্যমান।
দেশৰ ‘বেটী’ অৰ্থাৎ কন্যা সকলৰ বিৰুদ্ধে এতিয়া নিতৌ বৃদ্ধি পাইছে অপৰাধমূলক ঘটনা। দেশৰ যিকোনো প্ৰান্ততে নিতৌ উৎপীড়নৰ বলি হ’বলগীয়া হৈছে কন্যা সকল
এনে এক জঘন্য ঘটনা সংঘটিত হৈছে বিহাৰৰ বিহাৰৰ সুপল জিলাত। জিলাখনৰ সদৰ আৰক্ষী থানা অঞ্চলৰ লোধ গাঁৱৰ গাঁও বুঢ়াই একেটা পৰিয়ালৰ তিনিগৰাকী ভগ্নীক চলাইছে অকথ্য উৎপীড়ন।
এই ভয়ংকৰ কাৰ্য্যৰ বিৰুদ্ধে প্ৰতিবাদ কৰাৰ বাবে এগৰাকী কিশোৰীৰ নাক কাটি পেলাইছে গাঁও বুঢ়াজনে।
মুস্তাকিন নামৰ এই গাঁও বুঢ়াজনৰ বিৰুদ্ধে একেখন গাঁৱৰে এটা পৰিয়ালে এই অভিযোগ উত্থাপন কৰিছে। অভিযোগ অনুসৰি মুস্তাকিনে পৰিয়ালটোৰ তিনি গৰাকী ছোৱালীক শাৰীৰিক উৎপীড়ন চলায়।
মুস্তাকিনৰ এই উৎপীড়ণত প্ৰতিবাদ কৰি বাধা দিবলৈ চেষ্টা কৰাৰ বাবেই মুস্তাকিনে তীক্ষ্ণ অস্ত্ৰৰে এগৰাকী কিশোৰীৰ নাকত আঘাত কৰে।
আঘাতপ্ৰাপ্ত ছোৱালীজনীক চিকিৎসাৰ বাবে ততাতৈয়াকৈ চিকিৎসালয়লৈ লৈ যোৱা হয় বুলি ভুক্তভোগী পৰিয়ালটোৱে জানিবলৈ দিয়ে।
পৰিয়ালৰ সদস্যসকলে ইতিমধ্যে আৰক্ষী থানাত গাঁওবুঢ়া মুস্তাকিনৰ বিৰুদ্ধে অভিযোগ দাখিল কৰিছে।
আনহাতে, মুস্তাকিনে আৰক্ষী থানাত উপস্থিত হৈ তেওঁক আৰু তেওঁৰ সমৰ্থকসকলক পৰিয়ালটোৰ সদস্য সকলে আক্ৰমণ কৰিছিল বুলি আন এক অভিযোগ দাখিল কৰে।
দুয়োপক্ষৰ অভিযোগৰ পিছত ঘটনাৰ প্ৰকৃত কাৰণ পোহৰলৈ অনাৰ উদ্দেশ্যে ইতিমধ্যে আৰক্ষীয়ে তদন্ত আৰম্ভ কৰিছে।
