গুৱাহাটীৰ সৰুসজাই ষ্টেডিয়ামত হ’ব লগীয়া ভাৰত-ওমানৰ মাজৰ ফিফা বিশ্বকাপৰ কোৱালিফায়িং মেচখনৰ বাবে অসম ফুটবল সংস্থাৰ লগতে ৰাজ্য চৰকাৰে আৰম্ভ কৰিছে প্ৰস্তুতি।
লগতে পঢ়ক : ভাৰতে গুৱাহাটীৰ সৰুসজাইৰ পৰা আৰম্ভ কৰিব বিশ্বকাপ অভিযান!
প্ৰস্তুতি সম্পূৰ্ণ কৰি তুলিবলৈ আয়োজকৰ হাতত সময় মাত্ৰ ১৫ দিন আছে যদিও মেচখনৰ পূৰ্বে সকলো প্ৰস্তুতি সম্পূৰ্ণ হৈ উঠিব বুলি ফুটবল সন্থাৰ সম্পাদক হেমেন্দ্ৰ কুমাৰ ব্ৰহ্মই জানিব দিছে।
ইফালে এই গুৰুত্বপূৰ্ণ মেচখনত দৰ্শকৰ উপস্থিতি যাতে কোনো কাৰণতে কম নহয় তাৰ বাবে অসম ফুটবল সন্থাৰ তৰফৰ পৰা গুৱাহাটী মহানগৰীত প’ষ্টাৰিঙৰ ব্যৱস্থা কৰা হ’ব বুলিও সম্পাদক গৰাকীয়ে জনায়।
প’ষ্টাৰিঙৰ মূল আকৰ্ষণ হ’ব অসমৰ দুই খেলুৱৈ হলিচৰণ নাৰ্জাৰী আৰু বিনীত ৰাই। ইতিমধ্যে কোৱালিফায়িং মেচৰ বাবে ভাৰতীয় ফুটবল দলৰ প্ৰস্তুতি শিবিৰলৈ আমণ্ট্ৰণ লাভ কৰিছে অসমৰ এই দুগৰাকী খেলুৱৈয়ে।
লগতে পঢ়ক : ফুটবল বিশ্বকাপ কোৱালিফায়িং মেচৰ প্ৰস্তুতি শিবিৰত অসমৰ হলিচৰণ-বিনীত
দৰ্শকসকলে অনলাইনযোগে ‘বুক মাই শ্ব’ৰ জৰিয়তে টিকট ক্ৰয় কৰিব লাগিব। অৱশ্যে মেচৰ কেইদিনমান আগত কাউণ্টাৰৰ জৰিয়তেও টিকট বিক্ৰীৰ সম্ভাৱনা আছে বুলি আয়োজকে প্ৰকাশ কৰিছে।
এই হাইভল্টেজ মেচখনৰ বাবে ইতিমধ্যে আয়োজকে ২৩ হেজাৰ টিকট ছপা কৰিছে বুলি জনায়। ইয়াৰে ১৫ হেজাৰ দৰ্শকৰ বাবে আৰু বাকী ৮ হেজাৰ টিকট সংৰক্ষিত কৰিছে।
সোমবাৰে মেচখনৰ প্ৰস্তুতি সম্পৰ্কত জানিব দি সম্পাদক ব্ৰহ্মই টিকটৰ মূল্য সমূহো জানিব দিয়ে। টিকটৰ মূল্য হ’ব ২০০, ১০০ আৰু ৫০ টকা। ইয়াৰে ৫০ টকাটো হৈছে ছাত্ৰ-ছাত্ৰীৰ বাবে।
উল্লেখ্য যে অহা ৫ ছেপ্তেম্বৰত হ’ব লগীয়া এই মেচখনৰ বাবে ভাৰত আৰু ওমানৰ দল দুটা অহা ২ ছেপ্তেম্বৰত গুৱাহাটীত আহি উপস্থিত হ’ব। এই কথা জনাইছে সৰ্বভাৰতীয় ফুটবল ফেডাৰেশ্যনে।
