চৌদী আৰৱৰ প্ৰশাসনে সোমবাৰে ঘোষণা কৰে যে পবিত্ৰ মাহ ৰমজান উপলক্ষে পালন কৰিবলগা ‘উমৰাহ’ তীৰ্থযাত্ৰাত কেতবোৰ বাধা-নিষেধ আৰোপ কৰা হৈছে।
দেশখনৰ হজযাত্ৰা আৰু উমৰাহ মন্ত্ৰালয়ে এটা বিবৃত্তিত জনোৱামতে, কেৱল ক’ভিড-১৯ৰ ভেকচিন গ্ৰহণ কৰা লোকসকলকহে পবিত্ৰ মক্কাৰ কাবালৈ উমৰাহ যাত্ৰা আৰু প্ৰাৰ্থনাত অংশগ্ৰহণ কৰিব পাৰিব।
উল্লেখযোগ্য যে উমৰাহ হৈছে মক্কালৈ এটা তীৰ্থযাত্ৰা আৰু সমগ্ৰ বৰ্ষজুৰি ইয়াক পালন কৰা হয়।
চৌদী আৰৱে ঘোষণা কৰা অনুসৰি যিসকল লোকে দুবাৰকৈ অথবা উমৰাহ যাত্ৰা কৰাৰ ১৪ দিনৰ পূৰ্বে এবাৰকৈ ক’ভিড-১৯ ভেকচিন গ্ৰহণ কৰিছে, তেওঁলোকক অনুমতি প্ৰদান কৰা হ’ব।
অৱশ্যে যিসকল ক’ভিড আক্ৰান্ত ৰোগী ৰোগমুক্ত হৈছে, তেওঁলোকৰ ওপৰত কোনো বাধা-নিষেধ আৰোপ কৰা নহ’ব বুলিও চৌদী প্ৰশাসনে জনাইছে।
উল্লেখযোগ্য যে চৌদী আৰৱত বৰ্তমানলৈকে ৩৯৩,০০০ জন লোক ক’ভিডত আক্ৰান্ত হৈছে।
ইয়াৰে ৬,৭০০ লোকৰ ক’ভিডজনিত বেমাৰত মৃত্যু হৈছে।
৩৪ মিলিয়নৰো অধিকসংখ্যক লোকে বাস কৰা দেশখনত পাঁচ মিলিয়ন কভিড ভেকচিনৰ ব্যৱস্থা কৰা হৈছে বুলি দেশখনৰ স্বাস্থ্য বিভাগে জনাইছে।
উমৰাহ যাত্ৰাৰ উপৰত বাধা-নিষেধ আৰোপ কৰাৰ বিপৰীতে তলিত বৰ্ষৰ হজযাত্ৰাৰ বিষয়ে চৌদী প্ৰশাসনে বৰ্তমানলৈকে একো ভাষ্য প্ৰদান কৰা নাই।
উল্লেখযোগ্য যে ২০১৯ চনত বিশ্বৰ বিভিন্ন প্ৰান্তৰৰ ২.৫ মিলিয়ন মুছলিম ধৰ্মাৱলম্বী লোকে হজযাত্ৰা কৰাৰ বিপৰীতে কৰোণাভাইৰাচৰ বাবে ২০২০ চনত মাত্ৰ ১০,০০০ লোকে হজযাত্ৰাত অংশগ্ৰহণ কৰিছিল আৰু হজযাত্ৰীসকল কেৱল চৌদী নাগৰিক আছিল।
