ভাৰতৰ বেংকসমূহে নতুন বছৰৰ পহিলা দিনটোৰ পৰাই এ টি এম ব্যৱহাৰকে ধৰি বহুকেইটা নিয়মত সালসলনি কৰিছে।
এচ বি আইকে ধৰি ভাৰতৰ সকলো বেংকেই ১ জানুৱাৰিৰ পৰা গ্ৰাহকসকলৰ কিছুমান কাৰ্ডক অবৈধ ঘোষণা কৰিছে।
২০২০ চনৰ ১ জানুৱাৰিৰ পৰা বলবৎ হোৱা সালসলনিকেইটা চাওঁ আহক।
১. এ টি এম—
এচ বি আয়ে প্ৰথমবাৰৰ বাবে এ টি এম ব্যৱহাৰৰ ক্ষেত্ৰত অ’ টি পি (One time password)ভিত্তিক সেৱা আৰম্ভ কৰিছে।
এতিয়াৰে পৰা এচ বি আইৰ কাৰ্দৰ জৰিয়তে বেংকটোৰ এ টি এমৰ পৰা ১০ হাজাৰ বা তাতকৈ অধিক ধন উলিয়াবলৈ হ’লে আপোনাৰ একাউণ্টত সংলগ্ন ম’বাইল নম্বৰত এটা অ’ টি পি আহিব।
সেই অ’ টি পি ব্যৱহাৰ কৰিহে আপুনি ধন উলিয়াব পাৰিব।
ধন লেনদেনৰ ক্ষেত্ৰত আৰু এক তৰপ সুৰক্ষা প্ৰৱৰ্তনৰ বাবে এই ব্যৱস্থা কৰা হৈছে বুলি বেংকটোৱে প্ৰকাশ কৰিছে।
২. কিছুমান এ টি এম কাৰ্দ/ ডেবিট কাৰ্দ বন্ধ হ’ল—
এচ বি আইৰ লগতে সকলো ভাৰতীয় বেংকৰে ই এম ভি চিপ নথকা কাৰ্দসমূহ আজিৰ পৰা অবৈধ হৈ গৈছে।
বেংকসমূহে ৩১ ডিচেম্বৰ, ২০১৯ৰ ভিতৰত পুৰণি ডেবিট কাৰ্দসমূহ সলনি কৰি নতুন ল’বলৈ গ্ৰাহকসকলক পূৰ্বৰ পৰা আহ্বান জনাই আহিছিল।
পুৰণি মেগনেটিক ষ্ট্ৰাইপযুক্ত ডেবিট কাৰ্দতকৈ নতুন চিপযুক্ত কাৰ্দসমূহ অধিক সুৰক্ষিত হ’ব বুলি বেংকসমূহে প্ৰকাশ কৰিছে।
৩. গৃহ ঋণ সস্তা হ’ল–
১ জানুৱাৰিৰ পৰা এচ বি আইৰ গৃহ ঋণ সস্তা হ’ল। গৃহ ঋণৰ লগতে এম এচ এম ই ঋণ লওঁতাসকলৰ সুদৰ হাৰো হ্ৰাস কৰা হৈছে।
এতিয়াৰে পৰা পূৰ্বৰ ৮.১৫ শতাংশৰ সলনি ৭.৯ৰ পৰা এচ বি আইৰ গৃহ ঋণ আৰম্ভ হ’ব।
৪. এন ই এফ টি মাচুল ৰেহাই—
ভাৰতৰ বেংকসমূহত পহিলা জানুৱাৰিৰ পৰা অনলাইন ধন লেনদেনৰ ক্ষেত্ৰতো আহিছে এক পৰিৱৰ্তন।
এন ই এফ টিযোগে এতিয়াৰে ধন লেনদেনৰ ক্ষেত্ৰত আপুনি ভৰিব নালাগে কোনো মাচুল।
তাৰোপৰি ২৪ ঘণ্টাই এই সেৱা উপলব্ধ হ’ব।
লগতে পঢ়ক– কেনেকৈ জানিব আপোনাৰ কাৰ্ডখন বৈধ নে অবৈধ?
