দেশৰ ৰাজহুৱা খণ্ডৰ বৃহত্তম বেংক ষ্টেইট বেংক অব ইণ্ডিয়াই ইয়াৰ গ্ৰাহকলৈ এখন ৰাজহুৱা জাননীত তেওঁলোকৰ কে ৱাই চি সম্পূৰ্ণ কৰিবলৈ কৈছে।
২৮ ফেব্ৰুৱাৰি, ২০২০ তাৰিখৰ পূৰ্বে এয়া নকৰা গ্ৰাহকসকলৰ বাবে বেংকৰ সেৱাৰ অব্যাহত নাথিকব বুলি কোৱা হৈছে। এনে গ্ৰাহকক ব্লক কৰাৰ বাদে আন উপায় নাথাকিব, জাননীখনত কোৱা হৈছে।
Prevention of Money-Laundering Act-ৰ ব্যৱস্থাৱলী মতে, যেতিয়া এটা লেনদেন সম্পন্ন কৰা হয় বেংকবোৰে গ্ৰাহক চিনাক্তকৰণৰ নিৰ্ধাৰিত নিয়ম অনুসৰণ কৰিব লাগে। এইটো ৰিজাৰ্ভ বেংক অব ইণ্ডিয়াৰ ৱেবছাইটতো উল্লেখ আছে।
ৰিজাৰ্ভ বেংকৰ নিয়মাৱলীত কোৱা হৈছে যে ভাৰতৰ সকলো বেংকেই তেওঁলোকৰ গ্ৰাহকৰ কে ৱাই চি ২০২০ চনৰ ২৮ ফেব্ৰুৱাৰিৰ ভিতৰত আপডেইট কৰিব লাগিব আৰু এইটো জাননী যোগে বেংকে জনাব লাগিব।
গ্ৰাহকৰ কে ৱাই চি উন্নীত কৰাত বিফল হোৱা বেংকবোৰে জৰিমনাৰ সন্মুখীন হ’ব বুলিও এটা সূত্ৰত প্ৰকাশ।
এছ বি আইৰ সূত্ৰই জনোৱামতে, বেংকটোৱে ইতিপূৰ্বে তেওঁলোকৰ গ্ৰাহকসকললৈ কে ৱাই চি আপডেইট কৰিবলৈ বাৰ্তা (মেছেজ) প্ৰেৰণ কৰিছে।
কে ৱাই চি আপডেইট কৰাৰ বাবে গ্ৰাহকসকলে তেওঁলোকৰ পৰিচয় আৰু ঠিকনা প্ৰমাণ কৰিব পৰা নথিৰ প্ৰতিলিপি (যিবোৰ বেংকৰ দ্বাৰা গ্ৰহণযোগ্য) দিব লাগিব।
এছ বি আয়ে কে ৱাই চিৰ বাবে গ্ৰহণ কৰা নথিবোৰ তলত দিয়া ধৰণৰ :-
- পাছপ’ৰ্ট
- ভোটাৰ কাৰ্ড
- ড্ৰাইভিং লাইচেন্স
- আধাৰ লেটাৰ/কাৰ্ড
- এনৰেগা কাৰ্ড
- পান কাৰ্ড
