দিল্লীত অনুষ্ঠিত ‘ককৰোচ জনতা পাৰ্টি’ৰ প্ৰতিবাদী কাৰ্যসূচীত অংশগ্ৰহণ কৰাৰ বাবে আইনৰ এজন ছাত্ৰলৈ জাননী প্ৰেৰণ কৰা কাৰ্যক তীব্ৰ গৰিহণা দিছে উচ্চতম ন্যায়ালয়ে। গ্ৰেটাৰ নয়ডাৰ কাৰ্যবাহী দণ্ডাধীশৰ এনে পদক্ষেপক কঠোৰ ভাষাৰে সমালোচনা কৰি মুখ্য ন্যায়াধীশ সূৰ্য কান্তৰ বিচাৰপীঠে প্ৰশ্ন কৰে যে এজন দণ্ডাধীশে উচ্চতম ন্যায়ালয়ৰ নিৰ্দেশ উলংঘা কৰি এনে জাননী জাৰি কৰাৰ সাহস কেনেকৈ পালে।
উল্লেখযোগ্য যে গৌতম বুদ্ধ বিশ্ববিদ্যালয়ৰ ২০ বছৰীয়া ছাত্ৰ অক্ষত ত্ৰিপাঠীয়ে যন্তৰ-মন্তৰত অনুষ্ঠিত চিজেপিৰ প্ৰতিবাদত অংশগ্ৰহণ কৰাৰ লগতে সহপাঠীসকলকো উক্ত কাৰ্যসূচীলৈ যাবলৈ আহ্বান জনাইছিল। ইয়াৰ ভিত্তিত যোৱা ৪ ছেপ্টেম্বৰত ‘চৰকাৰবিৰোধী প্ৰচাৰ’ আৰু ‘উচটনি’ দিয়াৰ অভিযোগত আৰক্ষী আয়ুক্তালয়ৰ অধীনস্থ কাৰ্যবাহী দণ্ডাধীশগৰাকীয়ে ছাত্ৰজনলৈ এখন জাননী প্ৰেৰণ কৰিছিল।
বুধবাৰে অধিবক্তা বিশ্বজিৎ ভট্টাচাৰ্যই এই বিষয়টো উচ্চতম ন্যায়ালয়ৰ দৃষ্টিগোচৰ কৰে। সমগ্ৰ ঘটনাৱলীৰ বুজ লৈ মুখ্য ন্যায়াধীশ সূৰ্য কান্তই তীব্ৰ অসন্তুষ্টি প্ৰকাশ কৰে। তেওঁ স্পষ্টকৈ কয়, “আমি ইতিমধ্যে নিৰ্দেশ দিছিলোঁ যে কোনো ছাত্ৰৰ বিৰুদ্ধে বলপূৰ্বক পদক্ষেপ গ্ৰহণ কৰিব নোৱাৰিব। কোনো দণ্ডাধীশেই সেই নিৰ্দেশ উলংঘা কৰিব নোৱাৰে আৰু আমাৰ নিৰ্দেশ অমান্য কৰাৰ সাহস কাৰো নাই।”
স্মৰ্তব্য যে যোৱা ১ ছেপ্টেম্বৰত মুখ্য ন্যায়াধীশ সূৰ্য কান্ত, ন্যায়াধীশ জয়মাল্য বাগচী আৰু ন্যায়াধীশ ভি মোহনাৰ বিচাৰপীঠে নিৰ্দেশ দিছিল যে ২০ৰ পৰা ২৫ জুলাইৰ ভিতৰত হোৱা প্ৰতিবাদৰ সৈতে জড়িত ছাত্ৰ-ছাত্ৰীৰ বিৰুদ্ধে আন কোনো ৰাজ্যত নতুনকৈ গোচৰ ৰুজু কৰিব নোৱাৰিব। লগতে শান্তিপূৰ্ণ প্ৰতিবাদত অংশগ্ৰহণ কৰাটোক কোনোমতেই অপৰাধ হিচাপে গণ্য কৰিব পৰা নাযাব বুলিও ন্যায়ালয়ে পূৰ্বেই স্পষ্ট কৰি দিছিল।
উচ্চতম ন্যায়ালয়ৰ এই কঠোৰ স্থিতিৰ পাছতেই অৱশ্যে গ্ৰেটাৰ নয়ডাৰ দণ্ডাধীশগৰাকীয়ে জাননীখন প্ৰত্যাহাৰ কৰিবলৈ বাধ্য হয়। তথাপিও ন্যায়ালয়ৰ নিৰ্দেশ পোনপটীয়াভাৱে উলংঘা কৰাৰ অপৰাধত সংশ্লিষ্ট কাৰ্যবাহী দণ্ডাধীশ আৰু জিলা দণ্ডাধীশৰ পৰা বিচাৰপীঠে কাৰণ দৰ্শোৱাৰ জাননী বা স্পষ্টীকৰণ তলব কৰিছে।
