অসম আৰক্ষীয়ে এগৰাকী মহিলাক আটক কৰাৰ গোচৰৰ শুনানি গ্ৰহণ কৰিব উচ্চতম ন্যায়ালয়ে। এই গোচৰ ৰুজু কৰিছে এজন ২৬ বছৰীয়া যুৱকে। যুৱকজনে কয় যে তেওঁৰ মাতৃক অবৈধভাৱে আটক কৰা হৈছে।
অভিযোগ অনুসৰি অসম আৰক্ষীয়ে গোপনে বাংলাদেশলৈ মানুহ পঠিয়াই দিছে। মুখ্য ন্যায়াধীশ বি আৰ গাভাই আৰু ন্যায়াধীশ অগাস্টিন জৰ্জ মাছিহ আৰু ন্যায়াধীশ এ এছ চন্দুৰকাৰৰ বিচাৰপীঠে শুনানি গ্ৰহণ কৰে।
আবেদনকাৰী ইউনুচ আলীৰ হৈ অধিবক্তা শ্বোয়াইব আলমে আদালতত হাজিৰ হয়। তেওঁ জনোৱা মতে, ইউনুচৰ মাতৃক আৰক্ষীয়ে জিম্মাত লৈছে।
এই গোচৰৰ শুনানি সোমবাৰে অনুষ্ঠিত হ’ব বুলি মুখ্য ন্যায়াধীশে জানিবলৈ দিয়ে। মাতৃ মনোৱাৰা বেৱাৰ শীঘ্ৰে মুক্তিৰ দাবী তুলিছে ইউনুচ আলীয়ে। ২৪ মে’ত ধুবুৰী থানালৈ মাতি অনা হৈছিল মনোৱাৰা বেৱাক। ভাষ্য গ্ৰহণ কৰাৰ অজুহাতত তেওঁক মাতি অনা হৈছিল আৰু তাৰ পিছত জিম্মাত লোৱা হৈছিল।
অধিবক্তা আলমে অসমত ঘটি থকা এটা গুৰুতৰ সমস্যাৰ বিষয়ে অৱগত কৰে। নিশাটোৰ ভিতৰতে মানুহক আটক কৰি বাংলাদেশলৈ প্ৰেৰণ কৰা হৈছে বুলিও তেওঁ কয়। আনহাতে তেওঁলোকৰ আইনী গোচৰ এতিয়াও আদালতত চলি আছে।
আলমে কয় যে, মহিলাগৰাকীয়ে ২০১৭ চনত বিশেষ অনুমতিৰ আবেদন দাখিল কৰিছিল। জাননী জাৰি কৰা হৈছে, কিন্তু এতিয়াও আদালতত কাৰ্য্যবিধি চলি থকাৰ সময়তে মানুহক ঘূৰাই পঠিওৱা হৈছে। তেওঁ লগতে কয় যে কেইবাটাও ভিডিঅ’ ভাইৰেল হৈ আছে, য’ত দেখা গৈছে যে মানুহক নিশাটোৰ ভিতৰতে তুলি লৈ সীমান্তৰ সিপাৰে পঠিয়াই দিয়া হৈছে।
উল্লেখ্য যে ২০১৯ চনৰ ১২ ডিচেম্বৰত মনোৱাৰা বেৱাই জামিন লাভ কৰিছিল। উচ্চতম ন্যায়ালয়ে এক নিৰ্দেশ দিছিল, যাৰ অধীনত অসমৰ বিদেশী ডিটেনচন কেম্পত তিনি বছৰতকৈ অধিক সময় কটোৱাসকলক চৰ্তসাপেক্ষে মুকলি কৰি দিয়া হৈছিল।
আবেদনখনত উল্লেখ আছে যে যেতিয়া ইউনুচ আলীয়ে পিছদিনা থানালৈ গৈ বিষয়াসকলক কয় যে তেওঁৰ গোচৰ এতিয়াও উচ্চতম ন্যায়ালয়ত বিচাৰাধীন হৈ আছে, তেতিয়া তেওঁক মাতৃক লগ কৰিবলৈ দিয়া নহ’ল আৰু তেওঁক মুকলি কৰি দিবলৈ অস্বীকাৰ কৰে।
এই আৱেদনত গুৱাহাটী উচ্চ ন্যায়ালয়ৰ সিদ্ধান্তক প্ৰত্যাহ্বান জনোৱা হৈছে। উচ্চ ন্যায়ালয়ে বিদেশী ন্যায়াধিকৰণৰ সিদ্ধান্তক সমৰ্থন কৰিছিল, য’ত বেৱাক বিদেশী ঘোষণা কৰা হৈছিল। এই গোচৰটো ২০১৭ চনৰ পৰা উচ্চতম ন্যায়ালয়ত বিচাৰাধীন হৈ আছে।
আৱেদনখনত বেৱাক ধুবুৰী থানাত থকা ‘অবৈধ জিম্মা’ৰ পৰা শীঘ্ৰে মুকলি কৰি দিবলৈ কৰ্তৃপক্ষক নিৰ্দেশ দিবলৈ দাবী জনোৱা হৈছে। লগতে আটক কৰা ব্যক্তিজনক ভাৰতৰ যিকোনো সীমান্তৰ পৰা ‘বিতাড়ন’ বা ‘ওভতাই পঠিওৱা’ বন্ধ কৰাৰ দাবী জনোৱা হৈছে।
