ঝাৰখণ্ডৰ চাতৰা জিলাত এগৰাকী স্কুলীয়া ছাত্ৰীক অপহৰণ আৰু ধৰ্ষণ কৰাৰ অভিযোগত এজন যুৱকক মৰিয়াই হত্যা কৰাৰ এক চাঞ্চল্যকৰ ঘটনা সংঘটিত হৈছে। আৰক্ষীয়ে জনোৱা অনুসৰি, ৰাস্তাৰ পৰাই কিশোৰীগৰাকীক অপহৰণ কৰা হৈছিল। নিৰ্দিষ্ট সময়ত ঘৰলৈ উভতি নহাৰ বাবে পৰিয়ালৰ লোকসকল চিন্তিত হৈ পৰিছিল। যোৱা দুদিন ধৰি পৰিয়ালটোৱে কিশোৰীগৰাকীক সকলো ঠাইতে বিচাৰি আছিল যদিও কোনো সন্ধান পোৱা নাছিল। অৱশেষত মঙলবাৰে দুপৰীয়া কিশোৰীগৰাকী নিজে ঘৰলৈ উভতি আহে।
ঘৰলৈ অহাৰ পিছত কিশোৰীগৰাকীয়ে পৰিয়ালক জনায় যে ৰাস্তাৰে গৈ থকা অৱস্থাত এজন যুৱকে তেওঁক জোৰকৈ তুলি লৈ গৈছিল। ইয়াৰ পিছত দুদিন ধৰি যুৱকজনে তেওঁক নিজৰ ঘৰত আৱদ্ধ কৰি ৰাখি ধৰ্ষণ কৰে। এই বিষয়ে কাৰোবাক জনালে প্ৰাণে মৰাৰ ভাবুকিও দিছিল অভিযুক্ত যুৱকজনে। কিশোৰীগৰাকীৰ মুখত এই ভয়ংকৰ কথা শুনাৰ পিছতেই পৰিয়ালৰ লোক আৰু গাঁৱৰ ৰাইজ খঙত এক হৈ পৰে। তেওঁলোকে অভিযুক্ত যুৱকজনৰ ঘৰ ঘেৰাও কৰে আৰু তেওঁক ঘৰৰ পৰা বাহিৰলৈ চোঁচৰাই উলিয়াই আনি প্ৰচণ্ড মাৰপিট কৰিবলৈ আৰম্ভ কৰে। যুৱকজনক বচাবলৈ আহোঁতে তেওঁৰ দেউতাককো ৰাইজে প্ৰহাৰ কৰে।
ঘটনাৰ খবৰ পোৱাৰ লগে লগে আৰক্ষী ঘটনাস্থলীত উপস্থিত হয় আৰু গুৰুতৰভাৱে আহত অৱস্থাত যুৱকজনক উদ্ধাৰ কৰে। লগে লগে তেওঁক চিকিৎসালয়ত ভৰ্তি কৰোৱা হয়। কিন্তু অৱস্থা ক্ৰমান্বয়ে বেয়া হোৱাৰ বাবে তেওঁক আন এখন উন্নত চিকিৎসালয়লৈ স্থানান্তৰ কৰা হয়। সেই চিকিৎসালয়তেই যুৱকজনৰ মৃত্যু ঘটে। গাঁৱৰ ৰাইজে দাবী কৰা মতে, এই যুৱকজনৰ বিৰুদ্ধে আগতেও ধৰ্ষণৰ অভিযোগ আছিল আৰু ২০২৩ চনত তেওঁ জেলেও খাটিছিল। আৰক্ষীয়ে জানিবলৈ দিয়া মতে, যুৱকজনক মাৰপিট কৰি হত্যা কৰাৰ অপৰাধত ইতিমধ্যে আঠজন লোকক গ্ৰেপ্তাৰ কৰা হৈছে আৰু জড়িত থকা আন লোকসকলক চিনাক্ত কৰাৰ কাম চলি আছে।
