আৰু ৬ জন ক’ৰ’না ভাইৰাছত আক্ৰান্ত ব্যক্তিক চিনাক্ত কৰা হৈছে কেৰেলাত। মঙলবাৰলৈকে কেৰেলাত এই মাৰাত্মক ভাইৰাছত আক্ৰান্ত লোকৰ সংখ্যা হৈছে ১২ গৰাকী।
কেৰেলা চৰকাৰৰ কেবিনেট মিটিঙৰ পিছত সংবাদ মাধ্যমৰ আগত কেৰেলাৰ মুখ্যমন্ত্ৰী পিনাৰায়ী বিজয়নে কয় যে, ১,১১৬ জন ব্যক্তিক পৰ্যবেক্ষণত ৰখা হৈছে। ইয়াৰে ১৪৯ গৰাকীক বিভিন্ন চিকিৎসালয় আৰু ৯৬৭ গৰাকীক ঘৰত নিঃসঙ্গ অৱস্থাত আৱদ্ধ কৰি ৰখা হৈছে।
কেৰেলাৰ স্বাস্থ্য মন্ত্ৰী কে কে শৈলাজাই কয় যে, ১২ গৰাকী আক্ৰান্ত ব্যক্তিৰ মাজত এগৰাকী শিশুও আছে। আনহাতে মঙলবাৰে ধৰা পৰা ব্যক্তিসকলৰ ভিতৰত এজন বয়োজ্যেষ্ঠ ব্যক্তি আছে।
ইফালে প্ৰথমে ধৰা পৰা তিনিজন ব্যক্তিক ক’ৰ’না ভাইৰছমু্ক্ত হৈছে আৰু তেওঁলোকক ঘৰলৈ যাবলৈ দিয়া হৈছে।
ইতিমধ্যে চৰকাৰে স্কুল কলেজ আৰু চিনেমা হলবোৰ অহা ৩১ মাৰ্চলৈকে বন্ধ থাকিব বুলি ঘোষণা কৰিছে।
চি বি এছ ই আৰু আই ইচ এছ ই বোৰ্ডৰ বাকী পৰীক্ষাসমূহোল সদ্যহতে স্থগিত ৰখা হৈছে যদিও অষ্টম, নৱম শ্ৰেণী আৰু ভ’কশ্যনেল হায়াৰ ছেকেণ্ডাৰীৰ চূড়ান্ত পৰীক্ষাসমূহ বিশেষ কোঠাত সম্পন্ন কৰাৰ বাবে ব্যৱস্থা গ্ৰহণ কৰা হ’ব বুলি মুখ্যমন্ত্ৰীয়ে জনায়।
গীৰ্জা, মন্দিৰ আদি ধৰ্মীয় স্থানৰ লগতে উৎসৱ পাৰৱণৰ সমাৱেশবোৰ এৰাই চলিবলৈ জনগণক আহ্বান জনাইছে কেৰেলা চৰকাৰে।