ভৱিষ্যতে এআইয়ে (AI) মানুহক চেৰ পেলাব বুলি বহু আগতেই ভৱিষ্যদ্বাণী কৰা হৈছিল। অৱশ্যে এইবাৰ প্ৰকৃতিক অতিক্ৰম কৰিলে এআইয়ে। কাৰণ বিজ্ঞানীসকলে এআইৰ সহায়ত নতুন ভাইৰাছৰ সৃষ্টি কৰিছে। এটা বা দুটা নহয়, ১৬টা নতুন ভাইৰাছৰ সৃষ্টি কৰা হৈছে।
বহুতে ধাৰণা কৰে যে ইয়াৰ দ্বাৰা ভৱিষ্যতে চিকিৎসা বিজ্ঞানৰ উন্নতি হ’ব। একে সময়তে একাংশ বিশেষজ্ঞই সকীয়াই দিছে যে এআই ভুল হাতত পৰিলে দুৰ্যোগৰ সৃষ্টি হ’ব পাৰে।
চায়েঞ্চ জাৰ্নালত প্ৰকাশিত এক গৱেষণা পত্ৰত এআইৰ সহায়ত ১৬টা নতুন ভাইৰাছৰ সৃষ্টি হোৱাৰ কথা পোহৰলৈ আহিছে। এতিয়ালৈকে সেই ভাইৰাছবোৰৰ কোনোটোৰেই পৃথিৱীত অস্তিত্ব নাছিল। ষ্টেনফৰ্ড বিশ্ববিদ্যালয়, এম আই টিৰ ব্ৰড ইনষ্টিটিউট, হাৰ্ভাৰ্ডৰ বিজ্ঞানীসকলে এই অসাধ্য সাধন কৰিছে।
সমগ্ৰ প্ৰক্ৰিয়াটোৰ বিষয়ে ব্যাখ্যা কৰি বিজ্ঞানীসকলে কয় যে তেওঁলোকে এআই ব্যৱহাৰ কৰি হাজাৰ হাজাৰ জিন’ম সৃষ্টি কৰিবলৈ আগবাঢ়িছিল। সেই কামত বেক্টেৰিয়া সংক্ৰমিত কৰা ফেজ নামৰ এক প্ৰকাৰৰ ভাইৰাছক টেমপ্লেট হিচাপে ব্যৱহাৰ কৰা হয়।
বিজ্ঞানীসকলে প্ৰায় ৩০০ জিন’ম ৰাসায়নিকভাৱে সংশ্লেষণ কৰিছিল। পৰীক্ষাগাৰত তেওঁলোকৰ ওপৰত পৰীক্ষা-নিৰীক্ষা কৰা হৈছিল। আৰু তাৰ ফলত ১৬টা কাৰ্যক্ষম ভাইৰাছৰ সৃষ্টি হ’ল।
বিজ্ঞানীসকলে কয় যে কৃত্ৰিমভাৱে সৃষ্টি কৰা ভাইৰাছৰ মিশ্ৰণটোৱে প্ৰাকৃতিকভাৱে পোৱা ভাইৰাছতকৈ E.coli বেক্টেৰিয়া ধ্বংস কৰাত অধিক ফলপ্ৰসূ। তাৰ প্ৰমাণ পোৱা গৈছে।
গৱেষণা পত্ৰখনত কোৱা হৈছে যে, “কৃত্ৰিম জিন’মিক্সে নিৰ্দেশিত বিৱৰ্তন আৰু যুক্তিসংগত অভিযান্ত্ৰিকৰ ক্ষেত্ৰখনক আৰু অধিক সম্প্ৰসাৰিত কৰিব পাৰে। ই যেনেদৰে দ্ৰুতগতিত পৰিৱৰ্তিত ৰোগকাৰক জীৱাণুৰ বিৰুদ্ধে খাপ খুৱাবলৈ আৰু দীৰ্ঘস্থায়ী ফেজ থেৰাপীৰ পথ মুকলি কৰে, তেনেদৰে বৃহৎ আৰু জটিল জিনম ক’ড সৃষ্টিৰ পথো মুকলি কৰে।”
ইউনিভাৰ্চিটি অৱ টৰন্টো আৰু টৰন্টো জেনেৰেল হস্পিতালৰ সংক্ৰামক ৰোগ বিশেষজ্ঞ আইজাক বগোচে আল জাজিৰাক জনোৱা মতে, এই গৱেষণাই একেসময়তে আশা আৰু উদ্বেগ দুয়োটাকে জগাই তুলিছে।
আইজাকে কয়, “এআইৰ দ্বাৰা সৃষ্টি হোৱা ভাইৰাছে এন্টিবায়টিক প্ৰতিৰোধী সংক্ৰমণৰ বিৰুদ্ধে যুঁজ দিয়াৰ পথ মুকলি কৰিব পাৰে।কিন্তু একে সময়তে যদি এআই ব্যৱহাৰ কৰি ফলপ্ৰসূ ভাইৰাছ সৃষ্টি কৰা হয়, তেন্তে ই জৈৱ সুৰক্ষাৰ বিপদ হ’ব পাৰে। ইয়াৰ অপব্যৱহাৰ কৰি ক্ষতিকাৰক ৰোগ সৃষ্টিকাৰী জীৱাণু সৃষ্টি হ’ব পাৰে।সেয়েহে এনে প্ৰযুক্তিৰ বাবে কঠোৰ নিষেধাজ্ঞা, নিৰীক্ষণ আৰু কঠোৰ সুৰক্ষা প্ৰয়োজনীয়।”
এনে চিন্তাৰ কাৰণো আছে। কাৰণ শেহতীয়াকৈ ব্ৰিটিছ চৰকাৰৰ এআই নিৰীক্ষণ সংস্থাটোৱে কৈছিল যে এন্থ্ৰপিক আৰু অ’পেনএআইৰ কিছুমান উন্নত মডেলে অনুমোদন অবিহনে, স্বয়ংক্ৰিয়ভাৱে ক্ষতিকাৰক কাৰ্য্যকলাপত লিপ্ত হৈছে। ব্যক্তি আৰু কিছুমান সংগঠনে সেইবোৰ সক্ৰিয় কৰিছিল।
এআই ছিকিউৰিটি ইনষ্টিটিউটে কয় যে এন্থ্ৰপিকৰ ক্ল’ড মাইথছ ৫ এ আনৰ ৰূপ লৈ ভুৱা প্ৰফাইল সৃষ্টি কৰি অপেন চোৰ্ছ প্ৰকল্পত ক্ষতিকাৰক ক’ড সুমুৱাই দিয়াৰ চেষ্টা কৰিছিল। যোৱা মাহত OpenAI আৰু Anthropic য়েও এই বিপদৰ সংকেত দিছিল। তেওঁলোকে কয় যে তেওঁলোকৰ কিছুমান মডেলে কোনো নিৰ্দেশনা বা অনুমোদন অবিহনে অনলাইন হেকিঙৰ কামত লিপ্ত হৈছিল।
আমেৰিকাৰ ৰাষ্ট্ৰপতি ড’নাল্ড ট্ৰাম্পে যদিও প্ৰথম অৱস্থাত এআইক লৈ বিশেষ আমনি মূৰ ঘমোৱা নাছিল যদিও দ্বিতীয়বাৰৰ বাবে ক্ষমতালৈ অহাৰ পিছত তেওঁ নিষেধাজ্ঞা কটকটীয়া কৰিছে। জুন মাহত ট্ৰাম্পে স্বাক্ষৰ কৰা নিৰ্দেশনাত কোৱা হৈছে যে যিকোনো অত্যাধুনিক এআই মডেল বজাৰত মুকলি কৰাৰ পূৰ্বে ইয়াৰ মূল্যায়ন কৰিব লাগিব। সেই অনুসৰি আন্তঃগাঁথনি নিৰ্মাণ কৰিব লাগিব। যদিও সেই পদ্ধতিৰ মাপকাঠী প্ৰকাশ কৰা হোৱা নাই, যিটো সমালোচিত হৈছে।
