ৰাজ্যত ক’ভিড-১৯ ৰ সংক্ৰমণ বৃদ্ধি পোৱাৰ সময়তে ব্ৰহ্মপুত্ৰ নদীৰ জলপৃষ্ঠও বৃদ্ধি পাইছে। যাৰ বাবে অচিৰেই প্লাবিত হ’ব পাৰে কাজিৰঙা ৰাষ্ট্ৰীয় উদ্যান।
কাজিৰঙাত বাঢ়নি পানীৰ প্ৰৱেশ হ’লেই দক্ষিণৰ কাৰ্বি পাহাৰলৈ আৰম্ভ হ’ব বন্যপ্ৰাণীৰ প্ৰব্ৰজন। এনে পটভূমিত কাজিৰঙাৰ বন্যপ্ৰাণীৰ সুৰক্ষাৰ প্ৰতি লক্ষ্য ৰাখি বোকাখাত আৰু কলিয়াবৰ মহকুমা প্ৰশাসনে কজিৰঙাৰ ৩৭ নং ৰাষ্ট্ৰীয় পথাংশত আজিৰে পৰা প্ৰযোজ্য হোৱাকৈ ভাৰতীয় দণ্ডবিধি আইনৰ ১৪৪ ধাৰা জাৰি কৰিছে।
এই ধাৰা অনুসৰি এই পথাংশত বন্যপ্ৰাণীৰ নিৰাপত্তাৰ প্ৰতি লক্ষ্য ৰাখি যান-বাহনৰ গতিবেগ ঘন্টাত ৪০ কিলোমিটাৰ কৰাৰ উপৰি জনসমাগম আৰু চোকা অস্ত্ৰলৈ ৰাষ্ট্ৰীয় উদ্যানৰ সমীপত বিচৰণ নিষিদ্ধ কৰাৰ লগতে এই পথাংশত থকা পথৰ কাষত থকা ধাবা বোৰত গধুৰ বাহন ৰখাৰ ওপৰত নিষেধাজ্ঞা জাৰি কৰিছে।
ইফালে কাজিৰঙা ৰাষ্ট্ৰীয় উদ্যানৰ পূব দিশৰ ধনশিৰি মুখত ব্ৰহ্মপুত্ৰৰ জলপৃষ্ঠই আজি বিয়লি বিপদসীমা স্পৰ্শ কৰিছে। জলপৃষ্ঠ বাঢ়ি থাকিলে অহা দুটা দিনত কাজিৰঙা ৰাষ্ট্ৰীয় উদ্যানত বছৰৰ প্ৰথমতো বানৰ বাঢ়নি পানী সোমোৱাৰ আশংকা প্ৰকাশ কৰিছে।
