পুনৰ কৃষকসকলৰ সংসদ অভিমুখে অভিযান। উত্তৰ প্ৰদেশৰ কৃষকসকলে একাধিক দাবীৰে সোমবাৰে সংসদ অভিযানত নামিছে। কৃষিভূমি অধিগ্ৰহণত পৰ্যাপ্ত ক্ষতিপূৰণ, কৰ্মসংস্থাপন, পুনৰ্বাসন, কৃষিভূমি অধিগ্ৰহণত অধিগ্ৰহণ কৰা ২০ শতাংশ ভূমি ঘূৰাই দিয়াকে ধৰি কৃষকসকলৰ বিভিন্ন দাবী আছে।
ইয়াৰ উপৰিও কৃষকসকলে শস্যৰ বাবে নূন্যতম সমৰ্থন মূল্যৰ দাবীও তুলিছে। কৃষকসকলৰ সংসদ অভিযানক কেন্দ্ৰ কৰি ৰাজধানী আৰু ইয়াৰ কাষৰীয়া অঞ্চলত নিৰাপত্তা কটকটীয়া কৰি তোলা হৈছে।
ভাৰতীয় কিষাণ পৰিষদৰ নেতা সুখবীৰ খলিফাই দেওবাৰে কৃষকৰ সংসদ অভিযানৰ কথা ঘোষণা কৰে। তেওঁ কয় যে নতুন কৃষি আইন অনুসৰি আৰ্থিক ক্ষতিপূৰণ, পুনৰ্বাসনকে ধৰি ৫ দফীয়া দাবীৰে সোমবাৰে দুপৰীয়া ১২ বজাত নয়ডাৰ মহামায়া উৰণীয়া সেতুৰ পৰা অভিযান আৰম্ভ কৰা হ’ব।
কিষাণ মজদুৰ মৰ্চা আৰু সংযুক্ত কিষাণ মৰ্চাৰ সদস্যসকলেও এই অভিযানত অংশগ্ৰহণ কৰিব। কৃষকসকলে খোজকাঢ়ি আৰু ট্ৰেক্টৰেৰে সংসদ অভিমুখে যাত্ৰা কৰিব। সূত্ৰ অনুসৰি এই অভিযানত গৌতম বৌদ্ধ নগৰ, আগ্ৰা, আলিগড়, বুলন্দচহৰকে ধৰি উত্তৰ প্ৰদেশৰ ২০ খন জিলাৰ কৃষকে অংশগ্ৰহণ কৰিব।
কৃষকৰ অভিযান ৰোধ কৰিবলৈ দিল্লী আৰু গৌতম বৌদ্ধ নগৰ আৰক্ষীয়ে নয়ডা-দিল্লী সীমান্তত অসংখ্য বেৰিকেড স্থাপন কৰিছে। দিল্লীলৈ যোৱা বহু পথত যাতায়ত নিয়ন্ত্ৰণ কৰা হৈছে। নয়ডা-গ্ৰেটাৰ নয়ডা এক্সপ্ৰেছ হৈ যমুনা এক্সপ্ৰেছৰ পৰা দিল্লী আৰু গ্ৰেটাৰ নয়ডাৰ ছিৰছা আৰু সুৰজপুৰ পথলৈ নিষেধাজ্ঞা আৰোপ কৰা হৈছে।
অহা ৬ ডিচেম্বৰতো দিল্লী অভিযানৰ বাবে কিষাণ মজদুৰ সংঘৰ্ষ সমিতিৰ কাৰ্যসূচী আছে। সংগঠনটোৰ সাধাৰণ সম্পাদক চৰণ সিং পান্ধিয়াৰে জনায় যে পঞ্জাৱ-হাৰিয়ানাৰ শম্ভু সীমান্তত প্ৰতিবাদ সাব্যস্ত কৰা কৃষকসকলে অহা ৬ ডিচেম্বৰত দিল্লীলৈ গৈ শস্যৰ নূন্যতম সংগ্ৰহ মূল্যৰ দাবী উত্থাপন কৰিব।
