মুখ্যমন্ত্ৰী সৰ্বানন্দ সোণোৱালৰ ফটোৰ সৈতে ফেচবুকত এক বিতৰ্কিত পোষ্ট share কৰি বৰ্তমান কাৰাৰুদ্ধ হৈ থকা গুৱাহাটী বিশ্ববিদ্যালয়ৰ ছাত্ৰ দ্বীপজ্যোতি গগৈক আইনী সহায় আগবঢ়াবলৈ প্ৰস্তুত উচ্চতম ন্যায়ালয়ৰ জ্যেষ্ঠ অধিবক্তা উপমন্যু হাজৰিকা।
নৰ্থ ইষ্ট নাওলৈ প্ৰেৰণ কৰা এক বিজ্ঞপ্তিৰ জৰিয়তে এই কথা জনাইছে হাজৰিকাই।
“এজন সাধাৰণ পৰিয়ালৰ সাধাৰণ ছাত্ৰ হোৱাৰ বাবে দীপজ্যোতি গগৈৰ এই অন্যায়ৰ বিৰুদ্ধে যুঁজিবলৈ সামৰ্থ নাই। মই আৰু মোৰ সতীৰ্থ অধিবক্তাসকলে আহ্বান জনাইছো যে বাক স্বাধীনতা আৰু মৌলিক অধিকাৰ উলংঘনৰ কোনো ধৰণৰ ভুক্তভোগীৰ কাৰণে আমি আইনী সাহায্য আগবঢ়াবলৈ প্ৰস্তুত আছোঁ।” হাজৰিকাই এইদৰে কয়।
অন্যায়ৰ বিৰুদ্ধে যুঁজ দিয়াৰ এয়াই প্ৰকৃত সময় বুলি উল্লেখ কৰি হাজৰিকাই কয় “সকলোৱে নিজৰ বুলি আকোঁৱালি ল’লেহে আমি জাতি আৰু দেশ এনেকুৱা নেতাৰ পৰা উদ্ধাৰ কৰিব পাৰিম।”
যদি দীপজ্যোতি গগৈক কেৱল মাত্ৰ যোৱা বছৰৰ এটা বাৰ্তা সামাজিক মাধ্যমত আগবঢ়াই দিয়া আৰু অখিল গগৈৰ সমৰ্থনত কবিতা আবৃত্তি কৰাৰ বাবে গ্ৰেপ্তাৰ কৰিছে তেন্তে ই গণতন্ত্ৰৰ বাবে সংকটৰ সংকেত বুলি দাবী কৰে জ্যেষ্ঠ অধিবক্তগৰাকীয়ে।
হাজৰিকাৰ প্ৰশ্ন “দীপজ্যোতি গগৈ ইমান ঘোৰ অপৰাধী হ’ল নেকি যে এটা আনে সামাজিক মাধ্যমত দিয়া পোষ্টক আগবঢ়াই দিয়া কাৰণে মাজনিশা এটা আৰক্ষীৰ দ’ল গৈ ঘৰৰ পৰা গ্ৰেপ্তাৰ কৰিব লাগে ?”
তেওঁ আৰু কয় “যিটো সময়ত জনসাধাৰণ ক’ৰ’ণা আৰু বানপানীত ককবকাই আছে, তেনেস্থলত মূখ্যমন্ত্ৰী সৰ্বানন্দ সোণোৱালৰ মতে ৰাজ্যৰ প্ৰতি আটাইতকৈ ডাঙৰ ভাবুকি গুৱাহাটী বিশ্ববিদ্যালয়ৰ এজন সাধাৰণ ছাত্ৰই আবৃত্তি কৰা কবিতা আৰু সামাজিক মাধ্যমত দিয়া পোষ্টৰ পৰাহে আহিল নেকি?”
যিটো সময়ত শ শ মানুহ বানপানীত মৃত্যুবৰণ কৰিলে তেওঁলোকক বচাবলৈ আৰক্ষী প্ৰশাসনক মোতায়েন কৰিব নোৱাৰিলে কিন্তু এনেকুৱা অৰ্থবিহীন কামৰ বাবে আৰক্ষীক কিন্তু ঠিকেই মোতায়েন কৰিব পাৰিছে বুলি অভিযোগ তোলে হাজৰিকাই।
ইপিনে, অসমীয়া জাতি আৰু আহোম সম্প্ৰদায়ক অপমান কৰা গৰ্গ চেতাৰ্জীক গ্ৰেপ্তাৰ কৰিবলৈ গৈ মূখথেকেচা খোৱা অসম চৰকাৰ আৰু পুলিচ প্ৰশাসনে কিন্তু সাধাৰণ খিলঞ্জীয়াৰ ওপৰত ঠিকেই বীৰত্ব প্ৰদৰ্শন কৰিব পাৰিছে বুলি তেওঁ উল্লেখ কৰে।
“এয়া কেৱল মাত্ৰ দীপজ্যোতি গগৈৰ ক্ষেত্ৰতে আৰম্ভ হোৱা নাই। সামাজিক মাধ্যমত সোণোৱালক সমালোচনা কৰা সকলক সেই একেই ধৰণে আইনৰ সম্পূৰ্ণ অপব্যৱহাৰৰ কৰি, ভুৱা গোচৰ তৰি, তেওঁলোকক উদাহৰণ হিচাপে প্ৰস্তুত কৰি সকলোৰে মূখ বন্ধ কৰিবলৈ চেষ্টা কৰি আহিছে।” হাজৰিকাই এইদৰে কয়।
হাজৰিকাৰ মতে “আইনৰ সম্পূৰ্ণ অপব্যৱহাৰৰ ক্ষেত্ৰত উচ্চতম ন্যায়ালয়ৰ বিভিন্ন ৰায়দানৰ পৰা স্পষ্ট যে কোনো এজন নেতাক সমালোচনা কৰিলে, অপৰাধী গোচৰটো বাদেই আনকি এটা সাধাৰণ মানহানি আবেদনেই স্বীকাৰ নহয়। ২০১৫ চনত উচ্চতম ন্যায়ালয়ত শ্ৰেয়া সৃংঘালৰ আবেদনত এনেধৰণৰ গোচৰ ৰুজু কৰা আৰু গ্ৰেপ্তাৰ কৰাটো অ-সাংবিধানিক আৰু অবৈধ বুলি ঘোষণা কৰি Information Technology Actৰ অন্তৰ্গত Section 66(A) বাতিল কৰে।”
“সৰ্বানন্দ সোনোৱালে যিদৰে নিৰ্বাচনৰ সময়ত খিলঞ্জীয়া ৰাইজৰ আশা আকাংক্ষাৰ ওপৰত ভিত্তি কৰি প্ৰতিশ্ৰুতি দি প্ৰৱঞ্চনা কৰিলে, তেনেস্থলত তেওঁৰ সমালোচনা হোৱাটো স্বাভাৱিক। যিহেতু ৰাজপাট চলাবলৈ তেওঁৰ ন্যূনতম জ্ঞানো নাই আৰু সেয়েহে তেওঁ নিজক কৰা সমালোচনা সহ্য কৰিব নোৱাৰে কাৰণ তেওঁ গণতন্ত্ৰৰ মূল অধিকাৰ বুজি নাপায়।” হাজৰিকাই লগতে কয়।
