বিজেপিৰে মিত্ৰতাত আৱদ্ধ অসম গণ পৰিষদ দলটো লাহে লাহে শক্তিহীন হৈ অহা বুলি প্ৰায়েই চৰ্চা চলি আছে। আনকি আঞ্চলিক দলটোৰ মাজত আঞ্চলিক জাতীয়তাবাদৰ অভাৱ ঘটাৰ অভিযোগ কৰি ইতিমধ্যে ৰাজ্যখনত বিকল্প ৰাজনৈতিক শক্তিৰো উত্থান ঘটিছে।
ইয়াৰ মাজতে অসম গণ পৰিষদৰ নেতৃত্বতই নিৰ্বাচনী পৰিস্থিতিত দলটো টনকিয়াল কৰি তুলিবলৈ আপ্ৰাণ চেষ্টা চলাইছে। শনিবাৰে কেইবাগৰাকীও আছুৰ বিষয়ববীয়াই অগপত যোগদান কৰি এক প্ৰকাৰ অগপত প্ৰাণ সঞ্চাৰ কৰে।
সদৌ অসম ছাত্ৰ সন্থাৰ প্ৰাক্তন সহকাৰী সাধাৰণ সম্পাদক মনোৱাৰ হুছেইন, সাহিত্য সম্পাদক অঞ্জন কলিতা, কাৰ্য্যনিৰ্বাহক সদস্য সীমান্ত ঠাকুৰীয়াৰ নেতৃত্বত গুৱাহাটী মহানগৰীৰ লগতে অসমৰ বিভিন্ন স্থানৰ প্ৰায় ৩ শতাধিক প্ৰাক্তন আৰু বৰ্তমানৰ ছাত্ৰ সন্থাৰ বিষয়ববীয়া আৰু সদস্যই দলৰ সভাপতি অতুল বৰা আৰু কাৰ্য্যকৰী সভাপতি কেশৱ মহন্তৰ উপস্থিতিত অসম গণ পৰিষদ দলত আনুষ্ঠানিক ভাৱে যোগদান কৰে।
যোগদান কাৰ্য্যসূচীত উপস্থিত থাকি দলৰ সভাপতি অতুল বৰাই উত্তৰ পূৰ্বাঞ্চলৰ সৰ্ববৃহৎ আঞ্চলিক দল অসম গণ পৰিষদত সদৌ অসম ছাত্ৰ সন্থাৰ পৰা আহি যোগদান কৰাৰ বাবে উষ্ম আদৰণি জনাই কয় যে, বৰ্তমান সময়ত অসম গণ পৰিষদ দলৰ প্ৰতি ৰাইজৰ আস্থা আৰু বিশ্বাস বঢ়াৰ বাবেই নতুন নতুন তেজৰ আমদানি ঘটিছে।
বৰাই লগতে যুৱ আৰু ছাত্ৰ শক্তিক ঐক্যবদ্ধ ভাৱে অসম গণ পৰিষদ দলৰ মাধ্যমৰে ৰাইজৰ সেৱাত ব্ৰতী হোৱাত গুৰুত্ব আৰোপ কৰে।
তেওঁ কয় যে অসমৰ বিভিন্ন মহাবিদ্যালয়ত ইতিমধ্যে অসম গণ পৰিষদ দলৰ ভাতৃ সংগঠন অসম ছাত্ৰ পৰিষদৰ সহযোগত ছাত্ৰ একতা সভা সমূহ জয়লাভ কৰিবলৈ সক্ষম হৈছে। ১৯৮৫ চনৰ পৰা অভিজ্ঞতাপুষ্ট আঞ্চলিক ৰাজনৈতিক দলটোত এই নতুন তেজৰ আমদানিয়ে যুৱ প্ৰজন্মক আকৰ্ষিত কৰিবলৈ সক্ষম হৈছে।
সভাত কাৰ্য্যকৰী সভাপতি কেশৱ মহন্ত উপস্থিত থাকি যোগদানকাৰী সকলক আদৰণি জনোৱাৰ লগতে দলত থাকি নিষ্ঠা আৰু সততাৰে সেৱা আগবঢ়াই যাবলৈ আহ্বান জনায়।
সভাত দলৰ উপ-সভাপতি সুনীল ডেকা, সম্পাদক তথ্য প্ৰযুক্তি মণি মাধৱ মহন্ত, সম্পাদক তথ্য প্ৰচাৰ ড০ তপন দাস, সম্পাদক সংগঠন তুলাৰাম গগৈ, কাৰ্য্যনিৰ্বাহক সদস্য আছিকুৰ ৰহমান তথা অসম যুৱ পৰিষদ আৰু অসম ছাত্ৰ পৰিষদৰ কেন্দ্ৰীয় নেতৃত্ব উপস্থিত থাকে।
