‘ককৰোচ জনতা পাৰ্টি’ (CJP)ৰ দুই নেতা সৌৰভ দাস আৰু আশুতোষ ৰংকাৰ জামিনৰ শুনানিক কেন্দ্ৰ কৰি নতুন বিতৰ্কৰ সৃষ্টি হৈছে। শুনানিৰ সময়ত বিশেষ কাৰ্যবাহী দণ্ডাধীশক ভাবুকি দিয়াৰ অভিযোগ উত্থাপন হোৱাৰ পিছতে অচিনাক্ত ব্যক্তিৰ বিৰুদ্ধে এখন অপৰাধৰ তথ্য প্ৰতিবেদন (Non-Cognisable Report) পঞ্জীয়ন কৰিছে দিল্লী আৰক্ষীয়ে।
প্ৰতিবেদন অনুসৰি, যন্তৰ-মন্তৰত প্ৰতিবাদৰ সময়ত আটক হোৱা দুই নেতাৰ জামিনৰ শুনানি ১৮ অক্টোবৰত নিৰ্ধাৰিত সময়ত অনুষ্ঠিত নহ’ল। বিশেষ কাৰ্যবাহী দণ্ডাধীশগৰাকী নিৰ্ধাৰিত সময়ত উপস্থিত নোহোৱাৰ ফলত শুনানি পিছুৱাই যায় বুলি অভিযোগ কৰিছে CJPৰ আইনী বিষয়ৰ মুৰব্বী ৰত্না সিঙে।
ৰত্না সিঙৰ অভিযোগ অনুসৰি, দুই নেতাৰ জামিনৰ বাবে নিশ্চয়তা প্ৰদান কৰিবলৈ অহা চাৰিজন ব্যক্তিৰ জামিনদাৰী অস্পষ্ট কাৰণ দেখুৱাই নাকচ কৰা হৈছিল। দুপৰীয়া ১২ বজাত শুনানি অনুষ্ঠিত হোৱাৰ কথা আছিল যদিও বিয়লি ৪.৪২ বজালৈকে দণ্ডাধীশগৰাকী উপস্থিত হোৱা নাছিল বুলি তেওঁ সামাজিক মাধ্যমত উল্লেখ কৰে।
সিঙে লগতে অভিযোগ কৰে যে প্ৰতিবাদত অংশগ্ৰহণ কৰাৰ বাবে আৰক্ষীৰ গোচৰৰ সন্মুখীন হোৱা লোকসকলক অপৰাধমূলক অভিলেখ থকা ব্যক্তি হিচাপে গণ্য কৰা হৈছে। তেওঁৰ মতে, দুই নেতাক মুকলি কৰি দিয়াৰ প্ৰক্ৰিয়া ইচ্ছাকৃতভাৱে পিছুৱাই দিয়া হৈছে। এই ঘটনাক তেওঁ ক্ষমতাৰ অপব্যৱহাৰ বুলিও অভিহিত কৰে।
সিঙৰ ভাষ্য অনুসৰি, দণ্ডাধীশগৰাকীয়ে পিছত তেওঁলোকক জনাইছিল যে কোনোবাই তেওঁলৈ ভাবুকিপূৰ্ণ বাৰ্তা প্ৰেৰণ কৰিছে। CJPৰ অধিবক্তাসকলে এই সন্দৰ্ভত ব্যৱস্থা গ্ৰহণ কৰিবলৈ আৰু ভাবুকি প্ৰেৰণ কৰা ব্যক্তিগৰাকীৰ পৰিচয় প্ৰকাশ কৰিবলৈ দাবী জনোৱা বুলি সিঙে উল্লেখ কৰে। অৱশ্যে, এই অভিযোগসমূহৰ সন্দৰ্ভত দিল্লী আৰক্ষীয়ে কোনো প্ৰতিক্ৰিয়া প্ৰকাশ কৰা নাই বুলি PTI-ৰ প্ৰতিবেদনত কোৱা হৈছে।
উল্লেখ্য যে, যন্তৰ-মন্তৰক প্ৰতিবাদৰ নিৰ্ধাৰিত স্থানৰ তালিকাৰ পৰা আঁতৰোৱাৰ পিছতো বন্ধ প্ৰৱেশদ্বাৰ বগাই তাত প্ৰৱেশ কৰি প্ৰতিবাদ কৰাৰ অভিযোগত ১৪ অক্টোবৰত সৌৰভ দাস আৰু আশুতোষ ৰংকাক পাঁচ দিনৰ ন্যায়িক জিম্মালৈ প্ৰেৰণ কৰা হৈছিল। দলটোৰ নেতাদ্বয়ে অৱশ্যে তাত ৰাষ্ট্ৰীয় পতাকা উত্তোলন কৰি শ্লোগান দিছিল বুলি জানিবলৈ দিছিল।
ইয়াৰ পূৰ্বে CJP-য়ে অভিযোগ কৰিছিল যে দুই নেতাৰ মুক্তিৰ ক্ষেত্ৰত ইচ্ছাকৃতভাৱে পলম কৰা হৈছে। দলটোৱে সকীয়াই দিছিল যে তেওঁলোকক মুকলি কৰি নিদিলে সংশ্লিষ্ট বিষয়াসকলৰ বিৰুদ্ধে আইনী ব্যৱস্থা গ্ৰহণ কৰা হ’ব।
CJP-য়ে মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবী আৰু ভোটাৰ তালিকাৰ বিশেষ নিবিড় সংশোধন (SIR)ৰ বিৰোধিতাৰে প্ৰতিবাদ অব্যাহত ৰাখিছে। দলটোৰ দাবী, এই প্ৰক্ৰিয়াই ভোটাৰৰ অধিকাৰ বিপন্ন কৰিব পাৰে।
