বৃহস্পতিবাৰে কাজিৰঙাত দুখন যাত্ৰীবাহী বাছে ভয়ংকৰ পথ দুৰ্ঘটনা সংঘটিত কৰে। দুৰ্ঘটনাটোত বাছ দুখনৰ প্ৰচুৰ ক্ষতি সাধন হোৱাৰ লগতে কেইবাজনো যাত্ৰী গুৰুতৰভাৱে আহত হোৱা বুলি খবৰ আহি পৰিছে।
সূত্ৰৰ পৰা জানিব পৰা মতে, কাজিৰঙাৰ কহৰাত এই বৃহৎ পথ দুৰ্ঘটনাটো সংঘটিত হৈছে। এখন চলন্ত বাছে আন এখন বাছত খুন্দা মৰাৰ ফলতেই এই দুৰ্ঘটনাটো সংঘটিত হৈছে।
কাজিৰঙাত অনুষ্ঠিত হোৱা গজ উৎসৱ চাবৰ বাবে এই বাছখনত আহিছিল বহুকেইজন পৰ্যটক।
উল্লেখযোগ্য যে ভাৰতৰ ৰাষ্ট্ৰপতি দ্ৰৌপদী মুৰ্মুৱেও মুখ্য অতিথি হিচাপে কাজিৰঙা গজ উৎসৱত অংশগ্ৰহণ কৰিবলৈ অসমলৈ আহিছে। বৃহস্পতিবাৰে আগবেলা তেজপুৰ বিমান বন্দৰত অৱতৰণ কৰিছে ৰাষ্ট্ৰপতিগৰাকীয়ে।
এতিয়া ৰাষ্ট্ৰপতিগৰাকীয়ে অংশ ল’বলগা অনুষ্ঠানলৈ অহা যাত্ৰীবাহী বাছৰ এই দুৰ্ঘটনাটোৱে অঞ্চলটোত চাঞ্চল্যৰ সৃষ্টি কৰিছে।
আহত লোকসকলক ইতিমধ্যে চিকিৎসালয়ত ভৰ্তি কৰোৱা হৈছে বুলি খবৰ লাভ কৰা গৈছে।
