সোমবাৰে পুৱাই চিলিণ্ডাৰ গুৱাহাটীৰ সৰুম’টৰিয়াৰ বাগেশ্বৰী অঞ্চলত এক বিধ্বংসী অগ্নিকাণ্ডৰ ঘটনা সংঘটিত হয়। কেইবাখনো দোকান ভষ্মীভূত হোৱা এই অগ্নিকাণ্ডৰ ফলত কেইবা লাখ টকাৰ সামগ্ৰী ধ্বংস হয়।
আনহাতে, এই ঘটনাত কোনো লোক হতাহত হোৱাৰ খবৰ পোৱা নাই যদিও বিধ্বংসী অগ্নিকাণ্ডৰ ফলত স্থানীয় ব্যৱসায়ীসকলৰ যথেষ্ট ক্ষতিসাধন হয়।
স্থানীয় লোকে জানিবলৈ দিয়া মতে চিলিণ্ডাৰ বিস্ফোৰণৰ ফলতে এই অগ্নিকাণ্ডৰ সূচনা হয়। জুই দ্ৰুতগতিত বিয়পি পৰাৰ ফলত একাধিক দোকান জুইৰ কবলত পৰে। সূত্ৰৰ মতে শ্বৰ্ট ছাৰ্কিটৰ ফলত প্ৰথম কাপোৰত জুই লাগে আৰু সেই জুই তাত থকা টেন্ট হাউছৰ চিলিণ্ডাৰলৈ বিয়পি পৰি অগ্নিকাণ্ডৰ সূত্ৰ পাত ঘটে।
ইপিনে, দ্ৰুতগততি জুই বিয়পি থকাৰ সময়ত অগ্নিনিৰ্বাপক বাহিনীৰ গাড়ী পলমকৈ ঘটনাস্থলীত উপস্থিত হোৱাৰ বাবে স্থানীয় লোকে ক্ষোভ প্ৰকাশ কৰে। অগ্নিনিৰ্বাপক বাহিনী পলমকৈ উপস্থিত হোৱাৰ ফলত জুই অধিক বিয়পি পৰা বুলি দাবী কৰে।
অৱশ্যে পলমকৈ উপস্থিত হোৱাৰ পিছতো অৱশেষত কেইবাখনো অগ্নিনিৰ্বাপক বাহিনীৰ গাড়ীয়ে বিধ্বংসী অগ্নিকাণ্ডৰৰ সৈতে যুঁজি পৰিস্থিতি নিয়ন্ত্ৰণ কৰে।
কৰ্তৃপক্ষই বিস্ফোৰণৰ কাৰণৰ তদন্ত কৰি ক্ষতিগ্ৰস্ত ব্যৱসায়িক প্ৰতিষ্ঠানসমূহৰ ক্ষয়ক্ষতিৰ মূল্যায়ন কৰিব বুলি আশা কৰা হৈছে।
