শতক অৰ্জন কৰাৰ পিছতে বিৰাট কোহলীয়ে নতজানু হৈ শচীন টেণ্ডুলকাৰক প্ৰণাম কৰা দেখা গৈছে। শচীনেও থিয় হৈ হাত চাপৰি বজাই থকা দেখা গ’ল। ৱানখেড়ে শচীনৰ ঘৰুৱা খেলপথাৰ। সেই খেলপথাৰতে বিৰাটে শচীনৰ ৪৯ শতকৰ অভিলেখ ভংগ কৰিলে। এদিনীয়া ক্ৰিকেটত তেওঁ ৫০তম শতক অৰ্জন কৰে।
শচীনো আবেগত উথলি উঠিল। তেওঁৰ মনত পৰিছে বিৰাটক প্ৰথম লগ পোৱাৰ কথা। বিৰাটৰ পঞ্চাশ শতকৰ পাছত শচীনে ছচিয়েল মিডিয়াত লিখিছে, “যেতিয়া মই তোমাক প্ৰথমবাৰৰ বাবে ভাৰতৰ ড্ৰেছিং ৰুমত লগ পাইছিলো, তেতিয়া তোমাৰ সতীৰ্থসকলে ধেমালিতে মোক প্ৰণাম কৰিবলৈ কৈছিল। তেতিয়া কেৰিয়াৰ ভাল হ’ব। এয়া হেনো ভাৰতীয় দলৰ ড্ৰেছিং ৰুমৰ নিয়ম। তুমি সেই ধেমালিটো বুজি নাপাই মোক প্ৰণাম কৰিবলৈ গৈছিলা। মই হাঁহি বন্ধ কৰিব পৰা নাছিলোঁ। আজি তুমি মোৰ অন্তৰ চুই গলা। তোমাৰ প্ৰতিভা আৰু খেলৰ প্ৰতি থকা আকৰ্ষণে মোৰ মন চুই গৈছে। সেই সৰু ল’ৰাটো আজি বিৰাট হৈ উঠিছে। মই অত্যন্ত সুখী।”
ভাৰতীয় বেটছমেনে তেওঁৰ অভিলেখ ভংগ কৰাত অধিক সুখী শচীন। তেওঁ লিখিছে, ‘মই আটাইতকৈ বেছি সুখী যে এজন ভাৰতীয়ই মোৰ এই অভিলেখ ভংগ কৰিছে। আৰু বিশ্বকাপৰ ছেমি ফাইনেলৰ দৰে ডাঙৰ মঞ্চত কৰাৰ কৃতিত্বই সুকীয়া। আৰু মোৰ ঘৰুৱা খেলপথাৰত কৰাটো সঁচাকৈয়ে কেকৰ ওপৰত ৰখা চেৰিৰ দৰে।”
এটা সময়ত বিৰাটে ৰান পোৱা নাছিল। দৰাচলতে শতকীয় ইনিংছ খেলিব পৰা নাছিল। সেই সময়ত তেওঁ শচীনক লগ কৰিছিল। তেওঁৰ পৰা পৰামৰ্শ লৈছিল। তাৰপিছতে ৰাণৰ মাজলৈ প্ৰত্যাৱৰ্তন ঘটিল বিৰাটৰ। শচীন সঁচাকৈয়ে বিৰাটৰ গুৰু। ইনিংছৰ শেষত বিৰাটে কয়, ‘মোৰ হিৰো শচীন পাজী খেলপথাৰত আছে। তেওঁৰ সন্মুখত এই ইনিংছ খেলাটো এটা সপোনৰ দৰে।”
The first time I met you in the Indian dressing room, you were pranked by other teammates into touching my feet. I couldn’t stop laughing that day. But soon, you touched my heart with your passion and skill. I am so happy that that young boy has grown into a ‘Virat’ player.
— Sachin Tendulkar (@sachin_rt) November 15, 2023
বিৰাটে সপোন বাস্তৱায়িত কৰি পেলালে। বুধবাৰে তেওঁ ১১৩টা বলত ১১৭ ৰানৰ ইনিংছ খেলে। ৯টা চাৰি আৰু ২টা ছয় মাৰে। তেওঁ দৌৰি ৬৯ ৰান সংগ্ৰহ কৰে। ৩৫ বছৰীয়া বিৰাটে আৰু খেলি অধিক অভিলেখ ভংগ কৰি যাব, আৰু শচীনে সেয়া উপভোগ কৰি নয়ন জুৰাব!
