২০০৮ চনৰ প্ৰথম বৰ্ষৰ ইণ্ডিয়ান প্ৰিমিয়াৰ লীগ। কিংবদন্তী লেগ স্পিনাৰ শ্বেন ৱাৰ্নৰ নেতৃত্বৰ ৰাজস্থান ৰয়েলছত ১৯ বৰ্ষীয় অলৰাউণ্ডাৰ ৰবীন্দ্ৰ জাদেজা।
১৯ বছৰীয়া জাদেজাৰ দক্ষতা তথা প্ৰদৰ্শনত মুগ্ধ হৈছিল অধিনায়ক ৱাৰ্ন। ইয়াৰ পিছতে জাদেজাক “ৰকষ্টাৰ” বুলি মাতিবলৈ আৰম্ভ কৰিছিল ৱাৰ্নে।
অষ্ট্ৰেলিয়াৰ এই কিংবদন্তী তাৰকাগৰাকীৰ যোৱা নিশা হৃদৰোগত আক্ৰান্ত হৈ মৃত্যু ঘটে। মৃত্যুৰ এদিন পিছতে আজি ৱাৰ্নৰ ‘ৰকষ্টাৰ জাদেজা’ ই শ্বেন ৱাৰ্ণক এক দৰ্শনীয় শতকৰ দ্বাৰা শ্ৰদ্ধাঞ্জলি জনায়।
মোহালিত শ্ৰীলংকাৰ বিৰুদ্ধে চলি থকা প্ৰথম টেষ্টৰ দ্বিতীয় দিনা আজি জাদেজাই ১৭৫ ৰানৰ এটা আকৰ্ষণীয় ইনিংছ খেলে।
জাদেজাৰ শতক সম্পূৰ্ণ হোৱাৰ পিছতে তেওঁৰ পূৰ্বৰ আইপিএল ফ্ৰেঞ্চাইজি ৰাজস্থান ৰয়েলছে ৱাৰ্নে জাদেজাক অভিহিত কৰা ‘ৰকষ্টাৰ জাদেজা’ অভিধাটো স্মৰণ কৰি এটা টুইট কৰে।
ৰাজস্থান ৰয়েলছে টুইটটোত লিখে, “১৬০ বলত ১০০* ৰাণ। ৰকষ্টাৰ জাদেজা। আপুনি তেওঁক গৌৰৱান্বিত কৰিছে।”
100* off 160. Rockstar Jadeja. You’ve made him proud. ❤️
— Rajasthan Royals (@rajasthanroyals) March 5, 2022
বিচিচিআইয়েও আন এটা টুইটত ৱাৰ্নৰ ‘ৰকষ্টাৰ জাদেজা’ক শুভেচ্ছা জনায়।
‘Rockstar’ @imjadeja 👏👏@Paytm #INDvSL pic.twitter.com/JG25othE56
— BCCI (@BCCI) March 5, 2022
আনহাতে ৱাৰ্নে দিয়া ৰকষ্টাৰ অভিধা সন্দৰ্ভত জাদেজাই কয়, “তেতিয়া মই নাজানিছিলো ৰকষ্টাৰৰ অৰ্থ কি। যেতিয়া মই শ্বেন ৱাৰ্ণক প্ৰথমবাৰৰ বাবে লগ পাইছিলো, মই নাজানিছিলো যে তেওঁ টেষ্ট ক্ৰিকেটত এনে এজন মহান বলাৰ আছিল।”
“তেওঁ মোক ‘ৰকষ্টাৰ’ বুলি মাতিছিল, আৰু মই ভাবিছিলো যে মই কোনো গানো নাগাওঁ বা মই ৰকষ্টাৰ বুলি কোৱাৰ যোগ্য একো কামেই নকৰোঁ।”— তেওঁ কয়।
