ঐক্যৰ মাজত অনৈক্য নীতিৰে সদায়ে অসমীয়া সমাজ-জীৱনত এক সুকীয়া পৰিচয়েৰে জিলিকি আহিছে শিৱসাগৰ।
সকলো জাতি-জনগোষ্ঠী, ধৰ্মীয় লোকৰ মিলন ভূমি এই শিৱসাগৰ। একতাৰ এনাজৰীয়ে বান্ধ খাই থকা এই শিৱসাগৰে সদায়ে দেখুৱাই আহিছে সমন্বয়ৰ নিদৰ্শন।
তাৰেই এক উৎকৃষ্ট নিদৰ্শন আজি দেখিবলৈ পোৱা গ’ল শিৱসাগৰত অনুষ্ঠিত হৈ থকা শিৱৰাত্ৰিত।
২৮ ফেব্ৰুৱাৰীৰ পৰা ঐতিহাসিক শিৱসাগৰত অনুষ্ঠিত হৈ আহিছে শ্ৰী শ্ৰী শিৱৰাত্ৰি পূজা আৰু মেলা।
শিৱসাগৰৰ নগৰৰ মাজমজিয়াত অৱস্থিত ঐতিহাসিক শিৱদ’লৰ সন্মুখতেই আছে ১৯০২ চনতে প্ৰতিষ্ঠিত এটা মছজিদ।
আজি দুপৰীয়া মছজিদৰ নামাজৰ আজান দিয়াৰ সময়তে ধৰ্মীয় ৰীতিক সন্মান জনাই শিৱদ’লত মাইকত বাজি থকা ভক্তিমূলক গীত বন্ধ কৰি দিয়া হয়।
অৱশ্যে কেৱল এইবাৰেই নহয়, শিৱসাগৰত আয়োজিত শিৱৰাত্ৰি মহোৎসৱত প্ৰতি বছৰে এই নিদৰ্শন ধাৰাবাহিকভাৱে প্ৰচলন হৈ আহিছে।
উল্লেখ্য যে আজি শিৱদ’লৰ শিৱৰাত্ৰিৰ অন্তিম দিন।এই উপলক্ষ্যে আজি শিৱৰাত্ৰিৰ মেলাত যথেষ্ট ভিৰ পৰিলক্ষিত হৈছে।
শিৱৰাত্ৰিৰ অন্তিম দিনা শিৱদ’লত উপস্থিত হয় জনপ্ৰিয় কণ্ঠশিল্পী কল্পনা পাটোৱাৰী। শিৱদ’লত উপস্থিত হৈ ভোলানাথৰ শ্ৰী চৰণত আশীষ লয় শিল্পী গৰাকীয়ে।
