“অসমখন আমাৰ হয় আৰু ইয়াক আমাৰ হৈ থাকিবলৈ দিয়ক”; কেবৰ বিৰোধিতা প্ৰিয়ংকা ভৰালীৰ

জনপ্ৰিয় কণ্ঠশিল্পী প্ৰিয়ংকা ভৰালীয়েও পলমকৈ হ’লেও জাতিধ্বংসী নাগৰিকত্ব সংশোধনী বিধেয়কৰ বিৰোধিতা কৰিছে।

জনপ্ৰিয় কণ্ঠশিল্পীগৰাকীয়ে তেওঁৰ নিজৰ ফেচবুকৰ জৰিয়তে এই নাগৰিকত্ব সংশোধনী বিধেয়কৰ বিৰোধিতা কৰাৰ লগতে বিধেয়কখন বাতিল কৰাৰ দাবী জনায়।

প্ৰিয়ংকাই নিজৰ ফেচবুকৰ জৰিয়তে কয় যে, “আজি সমগ্ৰ অসমতে ‘কেব’ৰ প্ৰতিবাদ, চাৰিওফালে কেৱল কেবৰ প্ৰতিবাদ। এই প্ৰতিবাদত সমগ্ৰ অসমীয়াৰ অনুভূতি, অসমীয়াৰ অস্তিত্বও জ্বলিছে। মই চৰকাৰক অনুৰোধ জনাওঁ যে এই কেব বাতিল কৰক। কিয়নো অসমখন আমাৰ হয় আৰু ইয়াক আমাৰ হৈ থাকিবলৈ দিয়ক।”

উল্লেখযোগ্য যে ‘কেব’ প্ৰতিবাদৰ জুইয়ে দহিছে সমগ্ৰ ৰাজ্য। নাগৰিকত্ব সংশোধনী বিধেয়কৰ বাতিলৰ দাবীত সমগ্ৰ ৰাজ্যতে প্ৰতিবাদৰ জোৱাৰ।

আজি নাগৰিকত্ব সংশোধনী বিধেয়ক বাতিলৰ দাবীত নেছ’ই জনোৱা ১১ ঘণ্টীয়া বন্ধৰ প্ৰভাৱ সমগ্ৰ অসমতে সৰ্বাত্মক ৰূপত পৰা পৰিলক্ষিত হয়।

ৰাজ্যৰ বিভিন্ন দল-সংগঠন, ছাত্ৰ সমাজ, শিল্পী সমাজৰ লগতে সকলো স্তৰৰ লোকেই এই জাতি ধ্বংসী বিধেয়কৰ বিৰোধিতা কৰাৰ লগতে বিধেয়ক বাতিলৰ দাবী জনাইছে।