কেন্দ্ৰীয় চৰকাৰে তেৰটা প্ৰচলিত শ্ৰম আইন প্ৰত্যাহাৰ কৰি পেছাগত সুৰক্ষা, স্বাস্থ্য আৰু কামৰ পৰিৱেশ সম্পৰ্কীয় কোড, বিধেয়ক,২০১৯ আনিব বিচৰা কাৰ্য্যৰ বিৰুদ্ধে আজি শ্ৰমিক সংগঠনবোৰে দেশজুৰি বিক্ষোভ কাৰ্যসূচী ৰূপায়ণ কৰে।
দেশজুৰি শ্ৰমিকসকলৰ বিক্ষোভ কাৰ্য্যসূচীৰ অংশ হিচাপে বৰপেটা মিলেনিয়াম পাৰ্কত “চিটু”ৰ উদ্যোগত অৱস্থান ধৰ্মঘট পালন কৰি কেন্দ্ৰীয় চৰকাৰৰ বিৰুদ্ধে প্ৰতিবাদমুখৰ হৈ পৰে।
প্ৰতিবাদী কাৰ্য্যসূচীত অংশগ্ৰহণ কৰি “চিটু”ৰ বৰপেটা জিলা সমিতিৰ সভানেত্ৰী আৰু সম্পাদক ক্ৰমে ডলিমইনা চৌধুৰী আৰু প্ৰবাল দাসে কয় যে নতুন কোড বিধেয়কখনত সন্নিবিষ্ট কৰাৰ যোগেদি শ্ৰমিক-কৰ্মচাৰী অধিকাৰৰ ওপৰত মাৰাত্মক আঘাত হানিছে।
বিধেয়কৰ জৰিয়তে স্বাস্থ্য আৰু সুৰক্ষা বিধি মালিকপক্ষই উলংঘা কৰিলেও শ্ৰমিক কৰ্মচাৰী আৰু তেওঁলোকৰ ট্ৰেড য়ুনিয়নে এই বিধিসমূহ যথাযথভাৱে বলৱৎ কৰিবলৈ মালিকপক্ষক বাধ্য কৰাব নোৱাৰিব বুলিও উল্লেখ কৰা আছে।
দেশী-বিদেশী বৃহৎ পুঁজিপতি গোষ্ঠী বা কৰ্প’ৰেট বিলাকৰ স্বাৰ্থতহে এই বিধেয়ক অনা বুলি নেতা দুগৰাকীয়ে জনায়। শ্ৰমিক-কৰ্মচাৰীক নিৰ্মমভাৱে শোষণ কৰাৰ পথত যাতে নূন্যতম কোনো বাধা নাথাকে তাৰ বাবে আজি শ্ৰমিক সংগঠনবোৰে দেশজুৰি এই বিক্ষোভ কাৰ্যসূচী ৰূপায়ণ কৰা বুলি মন্তব্য কৰে।
কাৰ্যসূচীত অংগনবাডী সহায়িকা সন্থা, নিৰ্মাণ শ্ৰমিক সন্থা, মধ্যাহ্ন ভোজন কৰ্মী সন্থা, মটৰ শ্ৰমিক য়ুনিয়ন, চি আৰ ইউৰ নেতা কৰ্মীসকল উপস্থিত থাকে ৷