শিৱসাগৰ জিলা প্ৰশাসনৰ উদ্যোগত নগৰৰ বৰ্ডিং খেলপথাৰত আয়োজন কৰা স্বাধীনতা দিৱসৰ কাৰ্য্যসূচীত পতাকা উত্তোলন কৰে জলসম্পদ মন্ত্ৰী কেশৱ মহন্তই।
পতাকা উত্তোলনৰ পিছতেই আৰক্ষী, স্কাউট, গাইড আৰু গৃহৰক্ষী জোৱানৰ দ্বাৰা কুছ-কাৱাজ প্ৰদৰ্শন কৰা হয়। তাৰ পাছত কণ কণ ল’ৰা-ছোৱালীৰ মাজত বিভিন্নধৰণৰ খেল-ধেমালী অনুষ্ঠিত কৰা হয়। জিলা প্ৰশাসনে কাৰাগাৰৰ কয়দীসকলৰ মাজত, শিৱসাগৰ জিলা অসামৰিক চিকিৎসালয়ত ৰোগী আৰু প্ৰসূতি সকলৰ মাজত ফলমূল বিতৰণ কৰে।
বিয়লি জিলা প্ৰশাসন আৰু শিৱসাগৰ জিলা ক্ৰীড়া সন্থাৰ মাজত এখনি প্ৰীতি ফুটবল খেল অনুষ্ঠিত হয়।
ইয়াৰ উপৰিও শিৱসাগৰৰ বিভিন্ন অনুষ্ঠান প্ৰতিষ্ঠান, চৰকাৰী-বেচৰকাৰী কাৰ্য্যালয় আদিত দেশৰ ৭২ সংখ্যক স্বাধীনতা দিৱস উপলক্ষে পতাকা উত্তোলন কৰাৰ লগতে বিভিন্ন ধৰণৰ জনকল্যাণমূলক কামকাজ কৰা হয়।
‘ৰেছকিউ’ এন জি অ’ৱে নগৰৰ এ এচ টি চি তিনিআলিত আৰু কেন্দ্ৰীয় বজাৰৰ চাৰিওফালে ১০০ জোপাৰো অধিক গছ ৰোৱাৰ লগতে জুবিন ফেন ক্লাবেও কৌমুদালয়ৰ চৌহদত পছ পুলি ৰোৱে।
শিৱসাগৰ প্ৰেছ ক্লাবতো পুৱা সভাপতি, সম্পাদক তথা আন সাংবাদিকৰ উপস্থিতিত পতাকা উত্তোলন কৰা হয়।