শিৱসাগৰ জিলা প্ৰশাসনে জয়সাগৰ পুখুৰী পাৰত পোন্ধৰ বছৰ ধৰি অবৈধভাৱে চলি থকা হেৰিটেজ জয়সাগৰ নামৰ হোটেল ভাঙিবলৈ জাননী দিছে।
ঐতিহ্যমণ্ডিত জয়সাগৰ পুখুৰীৰ অস্তিত্বৰ উপৰি পাৰিপাৰ্শ্বিকতাৰ প্ৰতি ভাবুকি অনা বুলি অভিযোগ তুলি বিভিন্ন দল সংগঠনে হেৰিটেজ জয়সাগৰ নামৰ হোটেলখনৰ বিৰুদ্ধে অভিযোগ কৰিছিল শিৱসাগৰ জিলা প্ৰশাসনক।
ইপিনে আৰ টি আইৰ জড়িয়তে পোৱা তথ্যৰ আধাৰত হোটেলখন অবৈধভাৱে নিৰ্মাণ কৰাৰ বাতৰি প্ৰকাশ কৰিছিল একাংশ সংবাদ মাধ্যমে।
শিৱসাগৰ জিলা প্ৰশাসনে ফানচাইন গেটাৱেজ প্ৰাইভেট লিমিটেডৰ সঞ্চালকক দিয়া এক পত্ৰত উল্লেখ কৰিছে যে প্ৰশাসনে ফানচাইন গেটাৱেজক কেৱল জয়সাগৰ পুখুৰীত জলক্ৰীড়া চলাবলৈহে অনুমতি দিছে।
ইয়াৰোপৰি আন এক নিৰ্দেশ মতে ফানচাইন গেটাৱেজ প্ৰাঃ লিমিটেডক কেৱল খেৰৰ চালিৰে এখন ৰেষ্টোৰা বনাবলৈ অনুমতি দিয়া হৈছিল।
আনহাতে জিলা উপায়ুক্ত কাৰ্যালয়ৰ এচ.ভি.ডি/টেংক/০৮/০৫/২৯ দিনাংক ২১ নৱেম্বৰ ২০০৫ অনুমতি পত্ৰৰ মতে ফানচাইন গেটাৱেজ প্ৰাঃ লিমিটেডে কোনো ধৰণৰ স্থায়ী নিৰ্মাণ নকৰিবলৈ চৰ্ত আৰোপ কৰিছল আৰু সেই চৰ্ত উলংঘা কৰিলে অনুমতি বাতিল হ’ব বুলি স্পষ্টভাৱে উল্লেখ কৰা আছিল।
কিন্তু ফানচাইন গেটাৱেজ প্ৰাইভেট লিমিটেডে প্ৰশাসনৰ সকলো নিয়ম তথা চৰ্তাৱলী অমান্য কৰি উক্ত স্থানত পকী ৰেস্তোৰেন্ট, ৰিচিপচন কাউন্টাৰ, ডাইনিং হল, ৰান্ধনী ঘৰ, লেট্ৰিন বাথৰুম, পকী বেৰা আদি নিৰ্মাণ কৰাৰ বাবে শিৱসাগৰ জিলা প্ৰশাসনে ১৫ দিনৰ ভিতৰত হোটেল হেৰিটেজ ভাঙি পেলাবলৈ জাননী প্ৰেৰণ কৰিছে ফানচাইন গেটাৱেজ প্ৰাইভেট লিমিটেডক।
দীৰ্ঘদিনে জয়সাগৰ পুখুৰী পাৰত অবৈধভাৱে হোটেল নিৰ্মাণ কৰি চলাই থকা ফানচাইন গেটাৱেজ প্ৰাঃ লিমিটেডে প্ৰশাসনৰ এই নিৰ্দেশ মানি ১৫ দিনৰ সময়সীমাৰ ভিতৰত হোটেল জয়সাগৰ হেৰিটেজ ভাঙিব নে নেভাঙে সেয়া লক্ষণীয় হ’ব।
