গণ সংক্ৰমণৰ দিশে অগ্ৰসৰ হৈছে নেকি শিৱসাগৰ! শিৱসাগৰত দৈনিক বৃদ্ধি পাইছে ক’ভিড আক্ৰান্তৰ সংখ্যা।
আজি শিৱসাগৰৰ পাঁচজন ব্যক্তিৰ দেহত পোৱা গৈছে ক’ভিড পজিটিভ।
কিন্তু এই পাঁচজন ব্যক্তিৰ ভিতৰত তিনিজনৰ কোনো ভ্ৰমণ বৃত্তান্ত নাই।
শিৱসাগৰৰ ঢুলীয়াপাৰৰ দেৱজিত নেওগ আৰু স্মৃতি নেওগৰ দেহত আজি কোভিড পজিটিভ পোৱা গৈছে। দুয়োগৰাকীৰে কোনো ভ্ৰমণ বৃত্তান্ত লাভ কৰা নাই স্বাস্থ্য বিভাগে।
দেৱজিত নেওগ নৈশ বাছ চালক বুলি জানিব পৰা গৈছে।
আনহাতে শিৱসাগৰৰ যমুনা ৰোডৰ পিয়লি ফুকন পথৰ বাসিন্দা অনিতা পাইট নামৰ মহিলা গৰাকীৰও দেহত পোৱা গৈছে কোভিড পজিটিভ। মহিলা গৰাকীৰৰ ও কোনো ভ্ৰমণ বৃত্তান্ত লাভ কৰা নাই স্বাস্থ্য বিভাগে।
উল্লেখ্য যে শুকুৰবাৰে ৰাজীৱ দে নামৰ এছবিআইৰ কৰ্মচাৰীজনৰ দেহত পোৱা গৈছিল কোভিড পজিটিভ। কোভিডৰ লক্ষণ দেখা পোৱাত তেওঁ নিজে শ্বাৱ টেষ্ট কৰাত তেওঁৰ দেহত ধৰা পৰে ক’ভিড পজিটিভ।
ৰাজীৱ দে নামৰ ব্যক্তিজনৰ নাছিল কোনো ভ্ৰমণ বৃত্তান্ত। যাৰ বাবে এছবিআই শিৱসাগৰ শাখাটো কন্টেইনমেন্ট জ’ন হিচাপে ঘোষণা কৰে শিৱসাগৰ জিলা প্ৰশাসনে।
শিৱসাগৰৰ ভ্ৰমণ বৃত্তান্ত নথকা ব্যক্তিৰ দেহত কোভিড পজিটিভ পোৱাৰ পাছত শংকিত হৈ পৰিছে শিৱসাগৰবাসী। সচাঁকৈ শিৱসাগৰত কোভিড ১৯ৰ গণসংক্ৰমণ আৰম্ভ হৈছে নেকি ? এই প্ৰশ্ন উদয় হৈছে ৰাইজৰ মাজত।
শিৱসাগৰ জিলা প্ৰশাসনেও গণ সংক্ৰমণ ৰোধৰ বাবে গ্ৰহণ কৰিছে বিভিন্ন ব্যৱস্থা।
ইতিমধে চহৰৰ ৬ টা অঞ্চল কন্টেইনমেন্ট জ’ন হিচাপে ঘোষণা কৰাৰ লগতে ব্যক্তিগত যানবাহন চলাচলত যুগ্ম অযুগ্ম নীতিৰ ব্যৱস্থা কৰিছে।
আৰক্ষী প্ৰশাসনেও সামাজিক দূৰত্ব নমনা, মাস্ক পৰিধান নকৰাৰ ব্যক্তিৰ বিৰুদ্ধে কঠোৰ ব্যৱস্থা গ্ৰহণ কৰা দেখা গৈছে।
