এইবাৰ স্মাৰ্ট মিটাৰে জ্বলাইছে মন্ত্ৰী আৰু আইএএছ বিষয়াৰ আৱাসগৃহ। দৰিদ্ৰ জনতা তথা সাধাৰণ জনতাক স্মাৰ্ট মিটাৰে কঁকালত গোৰ শোধাই ৰং চোৱা মুখ্যমন্ত্ৰী ডঃ হিমন্ত বিশ্ব শৰ্মাৰ চৰকাৰৰ মন্ত্ৰীক এইবাৰ থিয় গোৰ শোধাইছে স্মাৰ্ট মিটাৰে। লগতে আইএএছ বিষয়াকো শোধাইছে প্ৰচণ্ড গোৰ।
প্ৰকাশ পাইছে আগষ্ট মাহৰ বিদ্যুতৰ বিল। আগষ্ট মাহৰ বিদ্যুতৰ বিলত স্পষ্ট হৈছে যে স্মাৰ্ট মিটাৰ সমৰ্থনত যুক্তি দিয়া মন্ত্ৰীসকলৰ থিয়ৈ থিয়ৈ গোৰ শোধাইছে স্মাৰ্ট মিটাৰে।
উল্লেখ্য যে, সাধাৰণ জনতাই স্মাৰ্ট মিটাৰৰ বিৰুদ্ধে প্ৰতিবাদ কৰাৰ পাছতে দিছপুৰৰ ১৮ টা মন্ত্ৰী আৱাস আৰু ৩৬ টা আইএএছ আৱাসত স্মাৰ্ট মিটাৰ স্থাপন কৰা হৈছিল। মন্ত্ৰী আৰু আইএএছ বিষয়াসকলৰ আৱাসত স্থাপন কৰা এই স্মাৰ্ট মিটাৰসমূহৰে এতিয়া বিল আহিছে। উক্ত বিলৰ পৰিমাণে এতিয়া সাধাৰণ জনতাৰ চকু কপালত উঠোৱাৰ পৰিৱৰ্তে এইবাৰ পৰ্বতসম বিলে মন্ত্ৰী-বিষয়াসকলৰ কঁকালত যেন থিয় গোৰহে শোধাইছে।
প্ৰকাশ পোৱা মতে, মন্ত্ৰী আৱাসত গাইপতি ৫০ ৰপৰা ৭০ হাজাৰ টকাকৈ বিল আহিছে। ইফালে আইএএছ বিষয়াৰ আৱাসত আহিছে গাইপতি ২০ ৰপৰা ৩০ হাজাৰ টকাৰ বিল। মন্ত্ৰী আৰু বিষয়া আৱাসৰ এই পৰ্বতসম বিলৰ পৰিমাণে এতিয়া সাধাৰণ জনতাৰ প্ৰতিবাদক যেন নায্যতা প্ৰদান কৰিলে।
স্মৰণযোগ্য যে স্মাৰ্ট মিটাৰৰ বিৰুদ্ধে ভুক্তভোগী সাধাৰণ জনতাই ৰাজ্যৰ বিভিন্ন প্ৰান্তত বিৰোধ প্ৰতিবাদ কৰি আহিছে। বিধানসভাৰ মজিয়াতো বিৰোধী বিধায়কসকলে বিষয়টোক লৈ সৰৱ হৈছিল। কিন্তু এই বিৰোধ আৰু বিৰোধিতাই হিমন্ত বিশ্ব শৰ্মাৰ চৰকাৰৰ গা লৰাব নোৱাৰিলে। বৰং স্মাৰ্ট মিটাৰৰ সপক্ষে বিভিন্ন অযুক্তিৰ মন্তব্যৰে পৰিৱেশ ঘোলা কৰিবলৈ ধৰিলে চৰকাৰী পক্ষই।
স্মাৰ্ট মিটাৰক লৈ বিধানসভাত সৰৱ হোৱাৰ বাবেই বিধায়ক অখিল গগৈ বাসগৃহতো চৰকাৰে স্মাৰ্টমিটাৰ স্থাপন কৰিছিল। ইয়াৰ সমান্তৰালভাৱে মন্ত্ৰী আৰু শীৰ্ষ বিষয়াৰ আৱাসতো স্থাপন কৰা হৈছিল স্মাৰ্ট মিটাৰ। এতিয়া এই স্মাৰ্ট মিটাৰে হিমন্ত বিশ্ব শৰ্মাৰ চৰকাৰৰ স্মাৰ্টনেছকে বুমেৰাং কৰিলে। অৰ্থাৎ এতিয়া এই স্মাৰ্ট মিটাৰে জনতাৰ বিৰোধ প্ৰতিবাদক নায্যতা দি চৰকাৰৰ মুখত ক’লা ছাইঁ সানিলে।
এতিয়া প্ৰশ্ন উঠিছে, জনতাৰ প্ৰতিবাদত হিমন্তৰ চৰকাৰে স্মাৰ্ট মিটাৰ প্ৰত্যাহাৰ কৰিব নে অঁকৰাই মৈ উঠাৰ দৰেই স্মাৰ্ট মিটাৰকে ব্যৱহাৰ কৰিবলৈ জনতাক কঁকাল প্ৰচণ্ড গোৰকে শোধাই থাকিব?
