ধূমপান বুলিলে আমাৰ মনলৈ প্ৰথমেই হাওঁফাওঁৰ ক্ষতি বা হাওঁফাওঁৰ কেঞ্চাৰৰ কথা আহে। কিন্তু শেহতীয়াভাৱে চিকিৎসকসকলে এক ভয়ংকৰ তথ্য সদৰী কৰিছে। তেওঁলোকৰ মতে ধঁপাতৰ বিষে কেৱল হাওঁফাওঁৰে নহয় বৰঞ্চ শৰীৰৰ প্ৰায় প্ৰতিটো অংগকে লাহে লাহে ধ্বংস কৰি পেলায়। বিশেষকৈ ১৫ বিধতকৈও অধিক কেঞ্চাৰৰ বাবে ধূমপান পোনপটীয়াকৈ দায়ী হ’ব পাৰে। আটাইতকৈ চিন্তনীয় বিষয়টো হ’ল এই ক্ষতিৰ প্ৰক্ৰিয়াটো শৰীৰৰ ভিতৰত অতি মনে মনে বহু বছৰ ধৰি চলি থাকে যাৰ ফলত মানুহে ইয়াৰ উমান পোৱাৰ আগতেই বিপদত ভৰি দিয়ে।
বিশেষজ্ঞসকলৰ মতে এটা চিগাৰেটৰ ধোঁৱাত ৭০ বিধতকৈও অধিক কেঞ্চাৰ সৃষ্টিকাৰী বিষাক্ত ৰাসায়নিক পদাৰ্থ থাকে। যেতিয়া এজন ব্যক্তিয়ে ধূমপান কৰে তেতিয়া এই বিষাক্ত উপাদানবোৰ কেৱল হাওঁফাওঁতে আবদ্ধ হৈ নাথাকে। তেজৰ জৰিয়তে এইবোৰ সমগ্ৰ শৰীৰত বিয়পি পৰে আৰু এটাৰ পিছত এটাকৈ অংগবোৰ আক্ৰান্ত কৰিবলৈ আৰম্ভ কৰে। এই মাৰাত্মক অভ্যাসৰ বাবে মুখ, জিভা, ডিঙি, খাদ্যনলী, পাকস্থলী, অগ্ন্যাশয়, লিভাৰ, কিডনী, মূত্ৰাশয়, জৰায়ুমুখ আৰু ডিম্বাশয়ৰ দৰে অংগবোৰত ক্যানসাৰ হোৱাৰ সম্ভাৱনা বহু পৰিমাণে বৃদ্ধি পায়। আনকি তেজৰ ক্যানসাৰৰ দৰে জটিল ৰোগৰ আঁৰতো ধূমপানৰ প্ৰভাৱ থাকে বুলি জানিব পৰা গৈছে।
অনেকে হয়তো আচৰিত হ’ব পাৰে যে ধূমপানৰ সৈতে মূত্ৰাশয় বা কিডনীৰ কেঞ্চাৰৰ সম্পৰ্ক কি। প্ৰকৃততে চিগাৰেটৰ বিষাক্ত ৰাসায়নিকবোৰ যেতিয়া কিডনীয়ে তেজৰ পৰা চেকি উলিয়াই দিয়ে তেতিয়া সেইবোৰ প্ৰস্ৰাৱৰ সৈতে মূত্ৰাশয়লৈ আহে। ইয়াৰ ফলত সেই বিষাক্ত পদাৰ্থবোৰে দীৰ্ঘদিন ধৰি মূত্ৰাশয়ৰ বেৰত আঘাত কৰি থাকে আৰু শেষত কেঞ্চাৰৰ সৃষ্টি কৰে। ধূমপানে কেৱল কোষ নষ্টই নকৰে বৰঞ্চ আমাৰ শৰীৰৰ স্বাভাৱিক ৰোগ প্ৰতিৰোধ ক্ষমতা আৰু কোষ মেৰামতি কৰাৰ শক্তিটোও দুৰ্বল কৰি পেলায়।
আমাৰ দেশত বিশেষকৈ মুখ আৰু ডিঙিৰ কেঞ্চাৰৰ সংখ্যা অতি আশংকাজনক। ইয়াৰ কাৰণ কেৱল চিগাৰেটেই নহয় বৰঞ্চ গুটখা, জৰ্দা বা ধোঁৱাবিহীন ধঁপাতৰ ব্যৱহাৰো সমানেই দায়ী। এনে ৰোগত আক্ৰান্ত হ’লে ৰোগীৰ কথা কোৱা, আহাৰ গিলা বা উশাহ লোৱাতো প্ৰচণ্ড কষ্ট হয়। ইয়াৰ উপৰিও যিসকল লোকে নিজে ধূমপান নকৰে কিন্তু ধূমপায়ীৰ ওচৰত থাকে তেওঁলোকৰ বাবেও বিপদ কম নহয়। এই পৰোক্ষ ধূমপানৰ ফলত পৰিয়ালৰ শিশু আৰু বৃদ্ধসকলৰ হৃদৰোগ আৰু ফুসফুসৰ গুৰুতৰ সমস্যা হ’ব পাৰে।
অৱশ্যে ইমানবোৰ বিপদৰ মাজতো এটা আশাৰ ৰেঙণি আছে। যদি এজন ব্যক্তিয়ে আজিৰ পৰাই ধূমপান ত্যাগ কৰে তেন্তে মাত্ৰ কেইঘণ্টামানৰ ভিতৰতে তেওঁৰ শৰীৰে নিজে নিজেই সুস্থ হোৱাৰ কাম আৰম্ভ কৰি দিয়ে। লাহে লাহে হাওঁফাওঁৰ কাৰ্যক্ষমতা বাঢ়ে, তেজ চলাচল উন্নত হয় আৰু কেঞ্চাৰৰ আশংকা কমিবলৈ ধৰে। যিহেতু নিকোটিন এবিধ নিচাযুক্ত দ্ৰব্য সেয়ে ইয়াক ত্যাগ কৰাটো প্ৰত্যাহ্বানজনক হ’ব পাৰে। এনে ক্ষেত্ৰত চিকিৎসকৰ পৰামৰ্শ বা বিশেষ থেৰাপীৰ সহায় ল’ব লাগে। মনত ৰাখিব ধূমপান ত্যাগ কৰাটো কেৱল এটা অভ্যাস ত্যাগ কৰাই নহয় বৰঞ্চ নিজৰ জীৱনটোক এক নতুন সুযোগ দিয়াৰ দৰে।
