স্বাস্থ্যজনিত কাৰণত জাপানৰ প্ৰধানমন্ত্ৰী ছিনজ’ এবেই প্ৰধানমন্ত্ৰীৰ পদ ত্যাগ কৰিব বুলি ঘোষণা কৰাৰ পিছতেই প্ৰযুক্তিৰ দেশ খনৰ পৰৱৰ্তী প্ৰধানমন্ত্ৰী কোন হ’ব তাকেলৈ যথেষ্ট চৰ্চা আৰম্ভ হৈছে।
এনে সময়তে জাপানৰ পৰৱৰ্তী প্ৰধানমন্ত্ৰীৰ পদত নিৰ্বাচিত হৈছে এজন কৃষকৰ পুত্ৰ ।
প্ৰধানমন্ত্ৰী পদৰ বাবে সোমবাৰে অনুষ্ঠিত নিৰ্বাচনত বিপুল সংখ্যক ভোট লাভ কৰি বিজয়ী হৈছে কৃষকৰ পুত্ৰ য়ুছিহাইড ছুগা।
জাপানৰ বৰ্তমানৰ প্ৰধানমন্ত্ৰী ছিনজ’ এবেৰ সোঁহাত স্বৰুপ ছুগাৰ প্ৰতিয়েই শাসনাধিষ্ঠিত দল লিবাৰেল ডেম’ক্ৰেটিক পাৰ্টীৰ গৰিষ্ঠসংখ্যক সাংসদে ভোটদান কৰে।
জাপানৰ সংসদৰ ৫৩৪ টা ভোটৰ ভিতৰত ছুগাই লাভ কৰে ৩৭৭ টা ভোট।তেওঁৰ প্ৰতিদ্বন্দ্বি ফুমিঅ’ কিছিডাই লাভ কৰিছে ৮৯টা ভোট। একেদৰে আন এগৰাকী প্ৰাৰ্থী ছিগেৰু ইছিবাই লাভ কৰিছে ৬৮ টা ভোট।
তাহানিৰ দিনৰে পৰাই ছিনজ’ এবেৰ সৈতে ছাঁটোৰ দৰে লাগি থকা ছুগাই তেওঁৰ শৈশৱ পাৰ কৰিছিল জাপানৰ অতি ভিতৰুৱা আকিটা অঞ্চলত।
হাইস্কুলীয়া শিক্ষা সমাপ্ত কৰি তেওঁ ট’কিঅ’লৈ আহিছিল আৰু ট’কিঅ’ৰ কাৰ্ড বোৰ্ডৰ কোম্পানীৰ লগতে শুকান মাছৰ কাৰখানাত সাধাৰণ কাম কৰিছিল।
পৰৱৰ্তী সময়ত তেওঁ জাপানৰ এল ডি পি দলৰ সৈতে জৰিত হৈ পৰিছিল আৰু ছিনজ’ এবেৰ বিশ্বাসী ঘনিষ্ঠ লোকত পৰিণত হৈছিল।
ছুগাক লৈ সেয়ে আশাবাদী আছিল জাপানৰ ৰাজনৈতিক বিশেষজ্ঞসকল।
ৰাজনৈতিক বিশেষজ্ঞ ব্ৰেণ্ড গ্ল’ছাৰমেনৰ মতে এবেই তেওঁৰ ঘনিষ্ঠ ব্যক্তি এজনৰ ওপৰতে দেশ শাসনৰ দায়িত্ব অৰ্পন কৰাৰ বহু সম্ভাৱনা আছে বুলি কৈছিল।
আন এগৰাকী ৰাজনৈতিক বিশেষজ্ঞ কাজুট’ ছুজুকিয়েও একে আশাই ব্যক্ত কৰিছিল।
অৱশেষত সকলো জল্পনা-কল্পনাৰ অন্ত পেলাই প্ৰযুক্তিৰ দেশ জাপানৰ পৰৱৰ্তী প্ৰধানমন্ত্ৰী হ’ল এজন কৃষকৰ সন্তান।
