লখিমপুৰ খেৰীৰ ঘটনাত নিহত এজন কৃষকৰ পুত্ৰই কেন্দ্ৰীয় মন্ত্ৰী অজয় মিশ্ৰৰ বিৰুদ্ধে নিৰ্বাচনত যুঁজ দিবলৈ আগবাঢ়িছে।
নিহত কৃষক নাচতাৰ সিঙৰ ডাঙৰ পুত্ৰ জগদীপ সিঙে কয় যে তেওঁ ২০২৪ চনৰ সাধাৰণ নিৰ্বাচনত মিশ্ৰৰ বিৰুদ্ধে প্ৰতিদ্বন্দিতা কৰিব বিচাৰে।
তেওঁ কয় যে তেওঁ বিধানসভা নিৰ্বাচনত প্ৰতিদ্বন্দীতা কৰিবলৈ সমাজবাদী পাৰ্টি আৰু কংগ্ৰেছে আগবঢ়োৱা প্ৰস্তাৱ প্ৰত্যাখ্যান কৰিছে। ইয়াৰ পৰিৱৰ্তে তেওঁক লোকসভা নিৰ্বাচনত দল দুটা প্ৰাৰ্থিত্ব দিবলৈ আহ্বান জনাইছে।
উল্লেখ্য যে ৩ অক্টোবৰত সংঘটিত লখিমপুৰ খেৰী হত্যাকাণ্ড সন্দৰ্ভত বিশেষ অনুসন্ধান দল(এছআইটি)ৰ দ্বাৰা দাখিল কৰা অভিযোগপত্ৰত কেন্দ্ৰীয় গৃহ ৰাজ্য মন্ত্ৰী অজয় মিশ্ৰৰ পুত্ৰ আশীষ মিশ্ৰক ইতিমধ্যে মুল অভিযুক্ত বুলি উল্লেখ কৰা হৈছে।
অভিযুক্ত আশীষ মিশ্ৰ বৰ্তমান কাৰাগাৰত আছে। সমগ্ৰ দেশতে খলকনি তোলা এই নৃশংস হত্যাকাণ্ডত নাচতাৰ সিঙকে ধৰি চাৰিজন কৃষকক মন্ত্ৰীপুত্ৰৰ গাড়ীৰ কনভয়ে মহতীয়াই নিছিল।
৩১ বছৰীয়া জগদীপ সিঙে কয় যে তেওঁৰ পৰিয়ালৰ কোনো ৰাজনৈতিক পৃষ্ঠভূমি নাই। “মই এছপি, বিএছপি আৰু কংগ্ৰেছকে ধৰি কাৰো সমৰ্থক নহয়। বৰ্তমান আমি নিৰ্বাচনত কৃষক নেতা তেজিন্দৰ সিং ভিৰ্কক সমৰ্থন আগবঢ়াইছো।” তেওঁ কয়।
আনহাতে কেন্দ্ৰীয় গৃহ ৰাজ্য মন্ত্ৰী অজয় মিশ্ৰক মন্ত্ৰী সভাৰ পৰা এতিয়ালৈকে বৰ্খাস্ত নকৰা সন্দৰ্ভত প্ৰতিক্ৰিয়া ব্যক্ত কৰি জগদীপ সিঙে কয় যে একমাত্ৰ ব্ৰাহ্মণ ভোট বেংকৰ লোভতে কেন্দ্ৰীয় চৰকাৰে এই কাম কৰা নাই।
“কেন্দ্ৰীয় গৃহ ৰাজ্যমন্ত্ৰীৰ পদৰ পৰা মিশ্ৰক অপসাৰণ নকৰাটো এটা অতি ডাঙৰ নিৰ্বাচনী বিষয়। ব্ৰাহ্মণ ভোট হেৰুওৱাৰ ভয়ত চৰকাৰে মিশ্ৰক আঁতৰ কৰা নাই।”- জগদীপ সিঙে কয়।
যেতিয়ালৈকে মিশ্ৰ গৃহ ৰাজ্যিক মন্ত্ৰীৰ পদত থাকে, তেতিয়ালৈকে কৃষক পৰিয়াল সমূহে ন্যায় লাভ নকৰে বুলিও উল্লেখ কৰে জগদীপে কয়।
