লাডাখৰ প্ৰতিবাদৰ ঘটনাত গ্ৰেপ্তাৰ কৰা অভিযন্তা, গৱেষক তথা সমাজ কৰ্মী সোণম ৱাংচুকৰ পত্নী গীতাঞ্জলি আংমোৰে তেওঁৰ মুক্তিৰ দাবীত উচ্চতম ন্যায়ালয়ৰ কাষ চাপিছে। সোণমক গ্ৰেপ্তাৰ কৰাটো ‘অবৈধ’ বুলি দাবী কৰি তেওঁ শীৰ্ষ আদালতত আবেদন দাখিল কৰিছে।
ইয়াৰ উপৰিও গীতাঞ্জলীয়ে ৰাষ্ট্ৰপতি দ্ৰৌপদী মুৰ্মু, প্ৰধানমন্ত্ৰী নৰেন্দ্ৰ মোডী, কেন্দ্ৰীয় গৃহমন্ত্ৰী অমিত শ্বাহ, কেন্দ্ৰীয় আইন মন্ত্ৰী অৰ্জুন ৰাম মেঘৱাল আৰু লাডাখৰ উপ-ৰাজ্যপাল কবিন্দ্ৰ গুপ্তালৈ পত্ৰ প্ৰেৰণ কৰি স্বামীৰ শীঘ্ৰে মুক্তি বিচাৰিছে।
পত্ৰখনত তেওঁ প্ৰশ্ন উত্থাপন কৰিছে, “ৰাইজৰ স্বাৰ্থক সমৰ্থন কৰাটো পাপ নেকি?” ছ’চিয়েল মিডিয়াত লিখিছে, ‘মই সোণম ৱাংচুকক মুক্তিৰ বাবে উচ্চতম ন্যায়ালয়ত বন্দী প্ৰত্যক্ষীকৰণ (হাবিয়াছ কৰ্পাছ) আবেদন দাখিল কৰিছো। আজি এসপ্তাহ হ’ল। তথাপিও ৱাংচুকৰ স্বাস্থ্য, তেওঁৰ অৱস্থা বা তেওঁক আটক কৰাৰ কাৰণৰ বিষয়ে মোৰ হাতত কোনো তথ্য নাই।‘
লাডাখত অশান্তিৰ তিনিদিন পিছত ২৬ ছেপ্টেম্বৰত গ্ৰেপ্তাৰ কৰা হৈছিল ৱাংচুকক। ‘থ্ৰী ইডিয়টছ’ চিনেমাত আমিৰ খানৰ চৰিত্ৰ ‘ৰাঞ্চো’ তেওঁৰ আৰ্হিত নিৰ্মাণ কৰা হৈছিল। বহুতে তেওঁক প্ৰকৃত ‘ৰাঞ্চো’ বুলিও কয়।
কেন্দ্ৰীয় শাসিত অঞ্চল প্ৰশাসনে কয় যে ৰাষ্ট্ৰীয় নিৰাপত্তা আইনৰ অধীনত ৱাংচুকৰ বিৰুদ্ধে গোচৰ ৰুজু কৰা হৈছে। লাডাখৰ আৰক্ষীৰ ডিজি এছ ডি সিং জামৱালৰ নেতৃত্বত আৰক্ষী বাহিনীয়ে নিশা ২:৩০ বজাত ৱাংচুকক তেওঁৰ লেহৰ ঘৰৰ পৰা গ্ৰেপ্তাৰ কৰে।
চৰকাৰী সূত্ৰৰ পৰা জানিব পৰা মতে, নিৰাপত্তাজনিত কাৰণত তেওঁক লেহ জেলৰ পৰিৱৰ্তে ৰাজস্থানৰ যোধপুৰ কাৰাগাৰলৈ প্ৰেৰণ কৰা হয়।
কিন্তু লাডাখবাসীৰ এটা অংশই ধাৰণা কৰে যে যোধপুৰক এনেদৰে বাছনি কৰা হৈছে যাতে লেহত ৱাংচুকৰ সমৰ্থকৰ প্ৰতিবাদৰ প্ৰভাৱ যাতে কাৰাগাৰত নপৰে। উল্লেখ্য যে ২৪ ছেপ্টেম্বৰত লাডাখত জেন জিৰ প্ৰতিবাদৰ পিছত বিদেশী অনুদান নিয়ন্ত্ৰণ আইন (এফচিআৰএ) উলংঘা কৰাৰ অভিযোগৰ ওপৰত শ্বাহৰ মন্ত্ৰালয়ে ব্যৱস্থা গ্ৰহণ কৰিছিল।
যোৱা মাহতে কেন্দ্ৰই ৱাংচুকৰ সংস্থা ‘হিমালয়ান ইনষ্টিটিউট অৱ অলটাৰনেটিভছ লাডাখ’ (HIAL) আৰু ‘Students Educational and Cultural Movement of Ladakh’ (SECMOL)ৰ বিৰুদ্ধে নিয়ম উলংঘা কৰি বিদেশী অনুদান লাভ কৰাৰ অভিযোগত চিবিআইৰ তদন্তৰ নিৰ্দেশ দিছিল।
