গুৱাহাটীৰ সোণাপুৰস্থিত হাতীমূৰা অঞ্চলত উন্মত্ত জনতাৰ প্ৰহাৰত এজন যুৱকে প্ৰাণ হেৰুৱাইছে। চুৰিৰ সন্দেহত একাংশ লোকে কৰা নিৰ্মম প্ৰহাৰৰ বলি হোৱা যুৱকজনক তেজপুৰৰ বৰঘাটৰ বাসিন্দা ৩৫ বছৰীয়া ফাৰজুল আলম বুলি চিনাক্ত কৰা হৈছে। এই অনাকাংক্ষিত ঘটনাই সমগ্ৰ অঞ্চলটোত তীব্ৰ প্ৰতিক্ৰিয়াৰ সৃষ্টি কৰিছে।
আৰক্ষীৰ সূত্ৰ অনুসৰি, শনিবাৰে পুৱতি নিশা ফাৰজুল আলমে সোণাপুৰৰ হাতীমূৰাৰ ‘মাইৰা’জ ৰিজ’ৰ্ট’ কৰ্তৃপক্ষৰ মালিকানাধীন এটা অট্টালিকাৰ চৌহদত প্ৰৱেশ কৰিছিল। অট্টালিকাটোৰ ভাড়াতীয়াই তেওঁক দেখা পাই লগে লগে বিষয়টো ৰিজ’ৰ্টৰ পৰিচালকক অৱগত কৰে। ইয়াৰ পিছতে ৰিজ’ৰ্ট কৰ্তৃপক্ষৰ ফালৰ পৰা এটা দল ঘটনাস্থলীত উপস্থিত হয়।
অভিযোগ অনুসৰি, ৰিজ’ৰ্টখনত কৰ্মৰত সাতজনীয়া এটা দলে ফাৰজুল আলমক এখন অট’ৰে ৰিজ’ৰ্টৰ চৌহদলৈ লৈ যায় আৰু তাত নিৰ্মমভাৱে প্ৰহাৰ কৰে। সোণাপুৰ আৰক্ষীয়ে গুৰুতৰভাৱে আহত যুৱকজনক উদ্ধাৰ কৰি গুৱাহাটী চিকিৎসা মহাবিদ্যালয় হাস্পতালত (GMCH) ভৰ্তি কৰায় যদিও চিকিৎসাধীন অৱস্থাতেই তেওঁৰ মৃত্যু হয়।
এই ঘটনাৰ সৈতে জড়িত থকাৰ অভিযোগত আৰক্ষীয়ে ইতিমধ্যে সাতজন লোকক আটক কৰিছে। আটক কৰা লোকসকল ক্ৰমে— মুস্তাফিজুৰ হক (ছিপাঝাৰ), চিত্ৰ দাস (মায়ং), ৰাম সোণাৰ (তিনিচুকীয়া), সুশীল নাথ (শিৱসাগৰ), ষ্টায়’জিত হালৈ (টিহু), ৰঞ্জিত ব্ৰহ্ম (বাক্সা) আৰু ৰিজ’ৰ্টৰ পৰিচালক মানৱ ৰয় (মায়ং)।
আৰক্ষীয়ে ঘটনা সন্দৰ্ভত তদন্ত অব্যাহত ৰাখিছে। ইফালে, মৃত যুৱকজনৰ পৰিয়ালে সমগ্ৰ ঘটনাৰ নিৰপেক্ষ তদন্ত কৰি দোষীসকলক দৃষ্টান্তমূলক শাস্তি প্ৰদান কৰিবলৈ দাবী উত্থাপন কৰিছে।
