বিগত ১১ ফেব্ৰুৱাৰিত টীয়কৰ সোণাৰী মিচিং গাঁৱত সংঘটিত হোৱা অগ্নিকাণ্ডৰ ফলত চাৰিটাকৈ বাসগৃহ জাহ জোৱা বাবে এইবাৰ গাঁৱখনৰ জনসাধাৰণে আলি আয়ে লৃগাং উদযাপন নকৰাৰ সিদ্ধান্ত গ্ৰহণ কৰে।
ইয়াৰ পৰিৱৰ্তে সোণাৰী মিচিং গাঁৱৰ জনসাধাৰণে হাতে হাতে দা, কোৰ লৈ গৃহ নিৰ্মাণৰ কামত ব্যস্ত হৈ পৰে।
উল্লেখযোগ্য যে, পূৰ্বে সোণাৰী মিচিং গাঁৱৰ ৰাইজে দুদিনীয়া কাৰ্য্যসূচীৰে আলি আয়ে লৃগাং অনুষ্ঠিত কৰাৰ সিদ্ধান্ত লৈছিল যদিও বিগত ১১ ফেব্ৰুৱাৰীত গাঁও খনত সংঘটিত হোৱা অগ্নিকাণ্ডৰ ঘটনাত চাৰিটাকৈ বাসগৃহ ভষ্মীভূত হোৱাক এক দুৰ্যোগৰ সন্মুখিন হয় পৰিয়াল কেইটা।
পৰিয়াল কেইটাৰ দুৰ্যোগৰ সমভাগী হৈ আলি আয়ে লৃগাংৰ সকলো কাৰ্যসূচী বাতিল কৰি আজিৰ এই পবিত্ৰ দিনটোত গাঁওখনৰ সকলো লোক সমবেত হৈ ক্ষতিগ্ৰস্ত হোৱা পৰিয়ালকেইটা থাকিব পৰাকৈ অস্থায়ীভাৱে গৃহ নিৰ্মাণ কৰিবৰ বাবে শ্ৰমদান কাৰ্যসূচী গ্ৰহণ কৰে আৰু আলি আয়ে লৃগাং উদযাপনৰ বাবে সংগৃহীত সকলো ধন পৰিয়াকেইটালৈ আগবঢ়ায়।
আজিৰ আধুনিকতাৰ যুগতো সোণাৰী মিচিং গাঁওবাসীয়ে দেখুওৱা এনে মহান কামে সকলোৰে দৃষ্টি আকৰ্ষণ কৰিছে।
