ইৰাণৰ সৰ্বোচ্চ নেতা আয়াতুল্লাহ আলী খামেনেইৰ হত্যাকাণ্ডক লৈ নিমাত প্ৰধানমন্ত্ৰী নৰেন্দ্ৰ মোডী। কংগ্ৰেছ নেত্ৰী ছোনিয়া গান্ধীয়ে মোডীৰ এই মৌনতাক লক্ষ্য কৰি সমালোচনা কৰে। কাশ্মীৰৰ কথা সোঁৱৰাই দি কেন্দ্ৰৰ বিৰদ্ধে সৰৱ কংগ্ৰেছ নেত্ৰীগৰাকী।
ছোনিয়া গান্ধীয়ে কয়, “১৯৯৪ চনত মুছলমান দেশসমূহৰ মিত্ৰজোঁট ‘অ’আইচি’ (অৰ্গেনাইজেচন অৱ ইছলামিক ক’অপাৰেচন)-এ ৰাষ্ট্ৰসংঘৰ মানৱ অধিকাৰ আয়োগত কাশ্মীৰ সন্দৰ্ভত ভাৰত বিৰোধী প্ৰস্তাৱ উত্থাপন কৰিছিল। কিন্তু সেই সময়ত আমাৰ বন্ধু ইৰাণে গুৰুত্বপূৰ্ণ ভূমিকা পালন কৰিছিল আৰু ইয়াক বাধা দিছিল।”
গান্ধীয়ে দাবী কৰে যে তেহৰাণৰ হস্তক্ষেপৰ বাবে স্পৰ্শকাতৰ সময়ত কাশ্মীৰক আন্তঃৰাষ্ট্ৰীয় মঞ্চত ইছ্যু হিচাপে উত্থাপন কৰাৰ চেষ্টা ব্যৰ্থ হয়। তেওঁ কয়, “সেই সময়ত ভাৰত অৰ্থনৈতিক সংস্কাৰৰ প্ৰাৰম্ভিক পৰ্যায়ত আছিল। আন্তঃৰাষ্ট্ৰীয় টাপ সৃষ্টি হ’লে দেশৰ কূটনৈতিক আৰু অৰ্থনৈতিক অৱস্থা অধিক জটিল হৈ পৰিব পাৰিলেহেঁতেন।”
কংগ্ৰেছ নেত্ৰীগৰাকীয়ে কয় যে ইৰাণে বিগত সময়ত কাশ্মীৰৰ ওপৰত ভাৰতৰ স্বাৰ্থ ৰক্ষাৰ ক্ষেত্ৰত সহায়ক ভূমিকা পালন কৰিছিল। গতিকে সাম্প্ৰতিক পৰিস্থিতিত নতুন দিল্লীৰ স্থিতি আৰু মৌনতা যথেষ্ট উদ্বেগজনক।
উল্লেখ্য যে যোৱা শনিবাৰে পুৱা ইৰাণক আক্ৰমণ কৰিছিল ইজৰাইলে। আমেৰিকাইও তাত যোগদান কৰে। শনিবাৰে পুৱা ইজৰাইলে প্ৰথমবাৰৰ বাবে তেহৰাণত আক্ৰমণ কৰে। ইৰাণৰ সৰ্বোচ্চ নেতা আয়াতুল্লাহ আলী খামেনেইৰ কাৰ্যালয়ৰ সমীপত সংঘটিত হয় বিস্ফোৰণ। তাতেই খামেনেই নিহত হয়।
ইজৰাইলে শনিবাৰে নিশা ইৰাণক আক্ৰমণ কৰাৰ পৰিকল্পনা কৰিছিল। কিন্তু ইজৰাইল আৰু আমেৰিকাই কিয় খৰখেদাকৈ পুৱা ৭ বজাত ইৰাণক আক্ৰমণ কৰিলে? অৱশেষত প্ৰকাশ পালে প্ৰকৃত কাৰণ। ইৰাণৰ সৰ্বোচ্চ নেতা আয়াতুল্লাহ আলী খামেনেইৰ গোপন তথ্য ইজৰাইলৰ ৰাষ্ট্ৰীয় চোৰাংচোৱা সংস্থাৰ হাতত পৰে।
আন্তঃৰাষ্ট্ৰীয় সংবাদ মাধ্যমৰ সূত্ৰ অনুসৰি শনিবাৰে পুৱা ৯:২৭ বজাত ৰাজধানী তেহৰাণত ধাৰাবাহিক বিস্ফোৰণ সংঘটিত হয়। সেই সময়ত ইৰাণৰ সৰ্বোচ্চ নেতা আয়াতুল্লাহ আলী খামেনেই তেওঁৰ কাৰ্যালয়ত কৰ্মৰত আছিল। তেওঁৱেই গোপনে এখন বৈঠক মাতিছিল। এই বৈঠকৰ বিষয়ে তথ্য তেওঁৰ ঘনিষ্ঠ সহযোগীসকলেহে জানিছিল।
জানিব পৰা মতে, পুৱা ৯ বজাত আলী খামেনেই তেহৰাণত এই বৈঠক অনুষ্ঠিত কৰাৰ কথা আছিল। সেই তথ্য ইজৰাইলৰ ৰাষ্ট্ৰীয় চোৰাংচোৱা সংস্থা মোছাদক ফাদিল কৰিছিল খামেনেইৰ এজন ঘনিষ্ঠ সহযোগীয়ে। নিশা হ’বলগীয়া আক্ৰমণটোৱে খামেনেইৰ গোপন ঘাটিটোৰ বিষয়ে তথ্য পোৱাৰ লগে লগে লগে লগে তেহৰাণক আক্ৰমণ কৰিবলৈ আৰম্ভ কৰে।
