কংগ্ৰেছ নেত্ৰী ছোনিয়া গান্ধীয়ে পুনৰবাৰ পেলেষ্টাইনৰ গণহত্যাক লৈ মোডী চৰকাৰক তীব্ৰ সমালোচনা কৰিছে। ছোনিয়াই বিশ্বাস কৰে যে ভাৰতে পেলেষ্টাইন বিষয়ত শক্তিশালী প্ৰতিক্ৰিয়া আৰু নেতৃত্ব প্ৰদৰ্শন কৰাটো প্ৰয়োজন। গাজাত মানুহৰ মৃত্যু মিছিলৰ পাছতো মোডী চৰকাৰৰ “গভীৰ মৌনতা”ই ভাৰতৰ মানৱতা আৰু নৈতিকতাক লৈ প্ৰশ্ন উত্থাপন হৈছে।
শেহতীয়াকৈ কাকতৰ এটা প্ৰতিবেদনত কংগ্ৰেছ নেত্ৰীগৰাকীয়ে কেন্দ্ৰীয় চৰকাৰক তীব্ৰ সমালোচনা কৰি কয় যে, “পেলেষ্টাইন বিষয়ত ভাৰতৰ পদক্ষেপ নৰেন্দ্ৰ মোদী আৰু নেতানিয়াহুৰ “বন্ধুত্ব”ৰ দ্বাৰা বহু পৰিমাণে প্ৰভাৱিত হৈছে।” গাজাত মৃত্যু মিছিলক লৈ আমেৰিকাৰ মনোভাৱকো ছোনিয়াই “বেদনাদায়ক আৰু মানৱতাৰ বাবে এক বৃহৎ আঘাত” বুলি অভিহিত কৰে।
বিশ্ব মঞ্চত নৰেন্দ্ৰ মোডীৰ ব্যক্তিগত সম্পৰ্কই কেতিয়াও ভাৰতৰ মনোভাৱ প্ৰকাশ কৰিব নোৱাৰে বুলিও কয়। বিশেষকৈ ১৯৮৮ চনত য’ত পেলেষ্টাইনক প্ৰথম স্বীকৃতি দিয়া হৈছিল, তাত মোডী চৰকাৰৰ কাৰ্যকালত ভাৰতে দুখন ৰাষ্ট্ৰৰ নীতি বৈঠকৰ পৰা বিৰত থকাটো অতি দুৰ্ভাগ্যজনক বুলি বিবেচনা কৰে কংগ্ৰেছৰ বৰ্ষীয়ান নেত্ৰীগৰাকীয়ে।
উল্লেখ্য যে গাজা যুদ্ধবিৰতি সন্দৰ্ভত বিগত তিনি বছৰত ভাৰতে চাৰিবাৰ ভোটদানৰ পৰা বিৰত আছিল। এই কাৰণেই পেলেষ্টাইনৰ প্ৰতি ভাৰতৰ স্থিতি সন্দৰ্ভত বিভিন্ন মহলত প্ৰশ্ন উত্থাপন হ’বলৈ ধৰে। ৰাজনীতিবিদসকলে কয় যে আমেৰিকা আৰু ইজৰাইলৰ সৈতে মোডীৰ বন্ধুত্বই এই প্ৰশ্নৰ মূল কাৰণ আছিল। অৱশেষত ভাৰতে শেহতীয়াকৈ আন ১৪২খন দেশৰ লগতে পেলেষ্টাইন আৰু ইজৰাইলৰ বাবে দুখন ৰাষ্ট্ৰৰ সমাধানৰ সপক্ষে ভোটদান কৰে।
ইতিমধ্যে গাজাত ইজৰাইলৰ আক্ৰমণত প্ৰায় ৬৪ হাজাৰ লোকৰ মৃত্যু হৈছে। ইয়াৰে প্ৰায় ৭০ শতাংশ শিশু আৰু মহিলা। ইয়াৰ সমান্তৰালকৈ নেতানিয়াহু চৰকাৰে বিশ্বৰ আন দেশৰ পৰা প্ৰেৰণ কৰা সাহায্যকো বাধা দি আছে। ইয়াৰ বিৰুদ্ধে ক্ষোভ প্ৰকাশ কৰি ছোনিয়াই কয় যে গাজাৰ জনসাধাৰণে দুৰ্ভিক্ষৰ দৰে পৰিস্থিতিৰ সন্মুখীন হ’বলগীয়া হৈছে, ইজৰাইলৰ সেনাই অতি প্ৰয়োজনীয় খাদ্য, ঔষধ আৰু অন্যান্য সাহায্যৰ যোগানত নিষ্ঠুৰভাৱে বাধা দিছে।
ছোনিয়াই কটাক্ষ কৰি কয় যে ইজৰাইলৰ দয়াৰে গাজা ষ্ট্ৰিপত প্ৰৱেশ কৰিবলৈ দিয়া সাহায্য হৈছে “হতাশাৰ সাগৰত মাত্ৰ কেইটোপালমান পানী”। সমগ্ৰ বিশ্বই পেলেষ্টাইন বিষয়ত ব্যৱস্থা লোৱাত পলম হৈছে আৰু কংগ্ৰেছ নেত্ৰীগৰাকীয়ে বিশ্বাস কৰে যে ভাৰতে কেৱল বৈদেশিক নীতিৰ বিষয় নহয়, মানৱতাৰ স্বাৰ্থত ইয়াক অধিক কঠোৰভাৱে নিন্দা কৰা উচিত।
