একাংশ সংবাদ মাধ্যমত প্ৰকাশিত বিভিন্ন খণ্ডৰ ছিণ্ডিকেটৰ বাতৰি সন্দৰ্ভত মুখ্য মন্ত্ৰী সৰ্বানন্দ সোণোৱালে অভিযোগ অনুসৰি যদি ছিণ্ডিকেট চলিছে তেতিয়া হ’লে ইয়াৰ বিৰুদ্ধে কঠোৰ ব্যৱস্থা গ্ৰহণৰ বাবে পদক্ষেপ ল’বলৈ আৰক্ষী সঞ্চালক প্ৰধানক আজি নিৰ্দেশ দিয়ে।
মুখ্য মন্ত্ৰীয়ে লগতে ছিণ্ডিকেটত জড়িত ব্যক্তি বা ব্যক্তি সমষ্টিৰ বিৰুদ্ধে কঠোৰ ব্যৱস্থা লোৱাৰ উপৰি গ্ৰেপ্তাৰ কৰাৰ পদক্ষেপ ল’বলৈও আৰক্ষী সঞ্চালক প্ৰধানক নিৰ্দেশ দিছে।
আজি এক বিকৃতিৰ জৰিয়তে মুখ্য মন্ত্ৰীয়ে কয় যে কোনো কাৰণতে ছিণ্ডিকেটৰাজ সহ্য কৰা নহ’ব। ইয়াৰ বিৰুদ্ধে কঠোৰ ব্যৱস্থা লোৱা হ’ব। উত্থাপিত বা-বাতৰি সন্দৰ্ভত নিজৰ প্ৰতিক্ৰিয়া ব্যক্ত কৰি মুখ্য মন্ত্ৰীয়ে লগতে কয় যে অসমৰ জনসাধাৰণৰ স্বাৰ্থত পৰিপন্থী তথা সমাজৰ বাবে অশুভ বাৰ্তা কঢ়িওৱা ছিণ্ডিকেট ৰাজ উৎখাতৰ বাবে বৰ্তমানৰ চৰকাৰখনে আৰম্ভণিৰে পৰা কঠোৰ তথা সক্ৰিয় পদক্ষেপ লৈ আহিছে। ইয়াৰ ফলশ্ৰুতিতে পূৰ্বৰ চৰকাৰৰ দিনত চলি থকা বহু ছিণ্ডিকেটৰাজ ইতিমধ্যে বিলুপ্ত হৈছে।
তৎস্বত্বেও বাতৰিত পৰিৱেশন কৰা ধৰণেৰে যদিহে ছিণ্ডিকেট ৰাজ চলি আছে তেতিয়াহ’লে ৰাজ্য চৰকাৰে এই ক্ষেত্ৰত কেতিয়াও নিৰৱে নাথাকে। প্ৰয়োজন হ’লে কঠোৰৰ পৰা কঠোৰতম পদক্ষেপ এই ক্ষেত্ৰত লোৱা হ’ব আৰু ইয়াৰ লগত জড়িত থকা যিকোনো ব্যক্তিৰ বিৰুদ্ধে উচিত পদক্ষেপ লোৱা হ’ব। আৰক্ষী সঞ্চালক প্ৰধানক এই ক্ষেত্ৰত সম্পূৰ্ণ কৰ্তৃত্ব প্ৰদান কৰা হৈছে বুলি মুখ্য মন্ত্ৰীয়ে কয়।
