অসমৰ ৰাজ্যিক জন্তু গঁড় হত্যা ৰোধৰ বাবে উন্নতমানৰ প্ৰশিক্ষণৰ অন্তত অত্যাধুনিক অস্ত্ৰ-শস্ত্ৰৰে সজ্জিত গঁড় সুৰক্ষা বাহিনীৰ বিশেষ জোৱানৰ ঘাতক দল এটা সাজু হৈছে চোৰাং চিকাৰীক প্ৰত্যাহবান জনোৱাৰ বাবে।
সমৰকলাৰ বিশেষ ৰণকৌশল, ভূমি কৌশল, ক্ষীপ্ৰ অস্ত্ৰ চালনা আদি সকলো দিশত পাৰ্গত কৰি গঁড় সুৰক্ষাৰ বাবে সাজু কৰি তোলা হৈছে এই বিশেষ প্ৰতিৰক্ষা বাহিনীৰ দলটোক।
বিগত ৪২ সপ্তাহ নগাঁৱৰ বঢ়মপুৰত অৱস্থিত অসম আৰক্ষী বাহিনীত প্ৰশিক্ষণৰ অন্তত ৮২ জনীয়া ঘাতক দলটোৱে চোৰাং চিকাৰীক মৃত্যুৰ দুৱাৰদলিলৈ পঠিওৱাৰ বাবে কেবল শাৰীৰিকভাৱে নহয় মানসিকভাৱে প্ৰস্তুত হৈছে।
উল্লেখযোগ্য যে, বিশেষ প্ৰশিক্ষণৰ অন্তত সাজু হৈ উঠা দলটোক কাজিৰঙা ৰাষ্ট্ৰীয় উদ্যানত গঁড়ৰ নিৰাপত্তাৰ দায়িত্ব অৰ্পন কৰা হ’ব।
প্ৰশিক্ষণ কালছোৱাত বিশেষ বাহিনীটোক চোৰাং চিকাৰীৰ সৈতে যুঁজাৰ বাবে বিশেষ সমৰকলাৰ প্ৰশিক্ষণ দিয়া হৈছে। চৰকাৰে প্ৰথমবাৰৰ বাবে নিযুক্তি দিয়া বিশেষ দলটোৰ জোৱানসকলে ইতিমধ্যে সুনিপুণভাৱে নিজৰ প্ৰশিক্ষণ সম্পূৰ্ণ কৰিছে।
আনহাতে, গড় সুৰক্ষা বাহিনীৰ প্ৰথমটো দল হিচাপে দীক্ষান্ত সমাৰোহত অংশগ্ৰহণ কৰি প্ৰতিগৰাকী জোৱানে গঁড় হত্যা ৰোধ কৰাৰ ক্ষেত্ৰত দৃঢঢ় সংকল্প লয়।
আনহাতে অসম চৰকাৰে গঠন কৰা এই গড় সুৰক্ষা বাহিনীৰ প্ৰশিক্ষণৰ অন্তত হোৱা দীক্ষান্ত সমাৰোহত অংশগ্ৰহণ কৰে অসমৰ বন আৰু পৰ্যটন মন্ত্ৰী পৰিমল শুক্ল বৈদ্য, প্ৰাক্তন মুখ্যমন্ত্ৰী তথা বঢ়মপুৰৰ বিধায়ক প্ৰফুল্ল কুমাৰ মহন্ত, নগাঁও জিলা উপায়ুক্ত শ্ৰী যাদৱ শইকীয়া আৰু নগাঁও জিলাৰ আৰক্ষী অধীক্ষক শংকৰব্ৰত ৰায় মেধিৰ লগতে বহুকেইজন বিশিষ্ট ব্যক্তিয়ে।
প্ৰশিক্ষণ কালৰ সময়ছোৱাত বিশেষ ক্ষেত্ৰত দেখুওৱা পাৰদৰ্শিতাৰ বাবে মূখ্য অতিথি তথা বন মন্ত্ৰী পৰিমল শুক্লবৈদ্য আৰু নৱম অসম আৰক্ষী বাহিনীৰ অধিনায়ক শ্ৰী ৰাজমোহন ৰায়ে বটাঁ প্ৰদান কৰে।
ভাষণ প্ৰসঙ্গত মন্ত্ৰীগৰাকীয়ে জোৱানসকলৰ মনোবল বঢ়াবলৈ আহ্বান জনোৱাৰ লগতে সুচাৰুৰূপে দায়িত্ব নিৰ্বাহৰ ক্ষেত্ৰত দৃঢ় হবলৈ আহ্বান জনায়।
কাজিৰঙা ৰাষ্ট্ৰীয় উদ্যানত নিয়োগ হ’ব লগা এই বিশেষ প্ৰশিক্ষণ প্ৰাপ্ত জোৱান সকল কিমান সফল হয় সেয়া অনাগত সময়তেহে দেখা পোৱা যাব যদিও জোৱানসকলক লৈ এতিয়া আশাবাদী সমগ্ৰ অসমবাসী।
