প্ৰা. প্ৰধান মন্ত্ৰী সিঙৰ পিছত গান্ধী পৰিয়ালৰ এছ পি জি নিৰাপত্তা কৰ্তন, কংগ্ৰেছৰ গৰিহণা

ভাৰতৰ প্ৰাক্তন প্ৰধান মন্ত্ৰী মনমোহন সিঙৰ পিছত কংগ্ৰেছ শীৰ্ষ নেতৃত্ব ছোনিয়া, ৰাহুল আৰু প্ৰিয়ংকা গান্ধীৰ এছ পি জি নিৰাপত্তা কেন্দ্ৰই শুকুৰবাৰে বাতিল কৰিছে, বাতৰিত প্ৰকাশ।

গৃহ মন্ত্ৰ্যালয়ৰ সূত্ৰৰে প্ৰকাশিত একাধিক বাতৰিত কোৱা হৈছে গান্ধী পৰিয়ালৰ সদস্যকেইজনক জেদ প্লাছ কেটেগৰিৰ নিৰাপত্তা আগবঢ়োৱা হ’ব।

কংগ্ৰেছ নেতাকেইজনৰ বিশেষ নিৰাপত্তা কৰ্তনৰ পিছত প্ৰধান মন্ত্ৰী নৰেন্দ্ৰ মোদী হ’ব এছ পি জি বেষ্টনীত থকা ভাৰতৰ একমাত্ৰ ব্যক্তি।

এই সন্দৰ্ভত বাতৰি লিখা পৰলৈকে চৰকাৰী বিবৃতি জাৰি হোৱা নাই যদিও কংগ্ৰেছে ইতিমধ্যে ইয়াৰ বাবে কেন্দ্ৰীয় চৰকাৰক কঠোৰ সমালোচনা কৰিছে।

প্ৰধান মন্ত্ৰী মোদী আৰু গৃহ মন্ত্ৰী শ্বাহক পোনপটীয়াকৈ সমালোচনা কৰি কংগ্ৰেছে ইয়াক “ব্যক্তিগত ঘৃণা আৰু বৈৰিতা”ৰ ৰাজনীতি বুলি অভিহিত কৰিছে।

কংগ্ৰেছৰ যোগাযোগ বিভাগৰ ৰাষ্ট্ৰীয় ভাৰবাহী ৰণদীপ সিং সূৰ্য্যৱালাই কিছু সময় পূৰ্বে বিষয়টো লৈ নতুন দিল্লীত সংবাদমেল সম্বোধন কৰিছে।

LIVE: Congress Party briefing by @rssurjewala, In-charge, Communications, AICC https://t.co/VtrSkbMU60

— Congress Live (@INCIndiaLive) November 8, 2019

কংগ্ৰেছ নেতা কে চি বেনুগোপালে প্ৰাক্তন প্ৰধান মন্ত্ৰী বাজপেয়ীয়ে এছ পি জি আইন সংশোধন কৰি গান্ধী পৰিয়ালক নিৰাপত্তা প্ৰদান কৰাৰ কথা উল্লেখ কৰিছে।

“ভাৰতৰ দুগৰাকীকৈ প্ৰধান মন্ত্ৰী ইন্দিৰা গান্ধী আৰু ৰাজীৱ গান্ধীক হত্যা কৰা হৈছিল আৰু ইন্দিৰা গান্ধী আৰু ৰাজীৱ গান্ধী পৰিয়ালক এছ পি জি নিৰাপত্তা দিবলৈ অটল বিহাৰী বাজপেয়ীয়ে আইন সংশোধন কৰিছিল। মোদী আৰু শ্বাহে এতিয়া সেইটো নোহোৱা কৰিছে,” বেনুগোপালে কয়।

অসমৰ কংগ্ৰেছ নেতা দেৱব্ৰত শইকীয়ায়ো কেন্দ্ৰৰ সিদ্ধান্তৰ “কঠোৰ গৰিহণা” দিছে, আৰু মোদী চৰকাৰ “সংসদীয় গণতন্ত্ৰৰ শিষ্টাচাৰৰ সৈতে অপৰিচিত” বুলি মন্তব্য কৰিছে।

খবৰটো বিয়পি পৰাৰ পিছতে কংগ্ৰেছৰ বহু নেতা-কৰ্মীয়ে নতুন দিল্লীত গৃহ মন্ত্ৰী শ্বাহৰ বাসভৱনৰ সন্মুখত প্ৰতিবাদ জনাইছে।

ভাৰতীয় সংসদৰ দি স্পেশ্যেল প্ৰটেকচন গ্ৰুপ এক্ত, ১৯৮৮ৰ অধীনত দেশৰ প্ৰধান মন্ত্ৰীসকল আৰু তেওঁলোকৰ তাৎক্ষণিক পৰিয়ালৰ সদস্যৰ নিৰাপত্তাৰ বাবে এছ পি জি গঠন কৰা হৈছিল।

এছ পি জি ভাৰতৰ লগতে দেশৰ বাহিৰতো নিৰাপত্তাধীন ব্যক্তিৰ সুৰক্ষাৰ দায়িত্বত নিয়োজিত থাকে।

এছ পি জিৰ ইউনিফৰ্ম পৰিহিত নিৰাপত্তাৰক্ষীৰ লগতে আন্দাৰকাভাৰ এ’জেণ্টসকলে অতি অত্যাধুনিক বিশেষ অস্ত্ৰ ব্যৱহাৰ কৰে।

এছ পি জি নিৰাপত্তাধীন ব্যক্তিৰ গাড়ী আৰু বিমানৰ ক্ষেত্ৰতো বিশেষ নিৰ্দেশনাৱলী আছে।